Ish-deputetja e LSI-së Silva Caka deklaron se jo vetëm largimi i Nasip Naços por edhe të figurave të tjera nga LSI drejt PS janë bërë me të vetmin qëllim që Edi Rama ti përdorë si limonë të shtrydhur. Për gazetarin Roland Qafoku në “HARD TALK” në “FJALA ËEB TV” Caka tha se në këto momente Edi Ramës Naço dhe të tjerë i nevojiten për ti përdorur dhe jo për vlera politike. Sipas Cakës, këto largime jo vetëm që nuk e kanë dobësuar Lëvizjen Socialiste për Integrim, por e kanë forcuar dhe rritur numrin e votave.
PËR LARGIMIN E NASIP NAÇOS DHE GLEDION REHOVICËS
Gjatë emisionit “HARD TALK” Ish-deputetja Silva Caka ka komentuar edhe largimin e bujshëm të ditëve të fundit nga LSI të Nasip Naços. Naço ka qenë një nga figurat kryesore të kësaj partie. Tre herë deputet e i zgjedhur, nënkryetar kuvendi, ministër i Ekonomisë dhe ministër i Drejtësisë, ai ka qenë pjesë e rëndësishme e vendimmarrjes së kësaj force politike. Por pak ditë më parë kryeministri Edi Rama publikoi një video në të cilën shfaqej duke biseduar me Nasip Naçon dhe që tregonte se ai ishte bërë pjesë e PS. Pak ditë më vonojë Naço u shfaq në krah të deputetit te PS Blendi Klosi dhe që tregonte se do jetë kandidat i PS në qarkun e Beratit. Madje Naço tha se Shqipëria nuk kishte nevojë për eksperimente politike. Por i fortë ka qenë reagimi i ish-deputetes së LSI-së Silva Caka. Për Cakën largimi i Naços nuk ka të bëjë fare me moralin politik por me taktikën e Edi Ramës për të shtrydhur disa politikanë dhe për t’i përdorur ata si limonë të shtrydhur. Mes të tjerave Silva Caka tha:
-Lajmi i ditës në politikën shqiptare është nga LSI-ja. Nasip Naço dhe Gledion Rehovica. Dua një prononcim tuajin edhe për faktin se jeni zgjedhur dy herë deputete nga qarku i Beratit. Sipas jush, sa e dëmton largimi i Nasip Naços LSI-në dhe çfarë ndodhi? Si ka mundësi? Unë kam përgatitur këtu një listë me figura të rëndësishme të LSI-së. Është Spartak Braho, Sabit Brokaj, Lefter Koka etj.
-Të gjitha figurat që përmende u përdorën si limon, u shtrydhën dhe u flakën.
-Nga kush?
-Nga Edi Rama. Të gjithë, absolutisht, pa përjashtim. Cilat kanë qenë arsyet nuk i di dhe nuk më intereson fare që t’i di. Unë do bëj vetëm një pyetje. E mban mend datën kur është zgjedhur Ilir Meta president? Që ishte mëse e ditur që do largohej nga kryetar i LSI-së?
-Ndoshta në prill.
-Me largimin e Ilir Metës LSI-ja nuk u dëmtua. Përkundrazi, u rrit me disa deputetë në zgjedhjet qëndrore të 2017. Dhe ti mendon se dikush tjetër mund ta dëmtojë LSI-në kur nuk e dëmtoi ikja e Ilir Metës?
-Nuk mund ta shpërfillësh Nasip Naçon.
-Jo, unë jo, por ndoshta qytetarët.
Në fakt që nga viti 2004 kur LSI është themeluar ka patur disa personazhe që janë larguar prej saj. Pëllumb Xhufi, Fatos Klosi, Ndre Legisi, Sabit Brokaj, Dritan Priftit, Robert Prifti, Spartak Braho, Lefter Koka dhe Gledion Rehovica që iu atashua Nasip Naços. Por a e kanë dëmtuar këto largime LSI-në? Ish-deputetja Silva Caka deklaroi për gazetarin Qafoku se kjo pyetje është bërë edhe më parë, edhe në 2005, edhe në 2009, edhe në 2017 dhe rezulton se numri i votuesëve të Lëvizjes Socialiste për Integrim është rritur. “Unë jam e bindur që edhe në këto zgjedhje, më 25 prill, LSI do marrë më shumë vota. LSI nuk trembet nga asnjë ikje. Ajo është zgjedhje e tyre dhe nuk ka vend për aludime”, shtoi Caka. Ndërkohë, lidhur me disa largime të mundshme të disa figurave të tjera nga LSI si Edmond Haxhinasto, Caka tha: Është abuzim i medias për Haxhinaston. Nuk është e vërtetë që ai është larguar apo do largohet. Haxhinasto është i LSI dhe i përket forcës sonë politike”, tha Caka.
Caka madje tha se se është skandaloze të mendosh se çfarë ka thënë të ikurit e fundit për të ikurit e parë.
-Po u bënë pak si shumë të larguar.
-Po çfarë dëmtoi ikja e Spartak Brahos?
-Si janë sjellë këta me ata që ikën në fillim Silva, jam kurioz të di?
-Po t;ua përmend se çfarë thoshin për njëri-tjetrin kam frikë se do ziheshin dhe do përçahen te PS-ja pastaj.
TË RINJTË E LSI NË VEND TË TË VJETËRVE
Janë të shumtë figurat e reja që LSI po promovon që duket se është një sfidë më vete. Një prej të rinjve është edhe ish-deputetja Silva Caka, por edhe të tjera si Kejdi Mehmetaj, Endrit Brahimllari, Klajda Gjosha, Floida Kërpaci, etj. Por as po bëhet i natyrshëm zëvendësimi i brezave dhe a ka një ndërthurje mes të rinjve dhe të vjetëreve që duhet thënë se kjo parti ka nevojë për eksperiencën e tyre. Caka tha se tashmë ky brez ka eksperiencën e vete dhe nuk mund të themi më se jemi të rinj.
-A ka ndonjë arsye pse duhet të votohet LSI-ja?
-Po, ka shumë arsye në fakt. LSI u krijua si një forcë politike e cila lindi në opozitë dhe qëndroi në opozitë për një kohë të gjatë dhe mblodhi rreth vetes intelektualë të ndryshëm e mbi të gjitha shumë të rinj. Arsyeja pse unë kam pranuar të aderoj në LSI, pasi unë kam pasur gjithmonë interesa të ndryshme për veten time. Kam studiuar juridik dhe aspirata ime ka qenë magjistratura; ose gjyqësori ose prokuroria. Arsyet pse hoqa dorë nga kjo gjë dhe iu bashkova LSI-së ishte sepse në momentin që unë i jam bashkuar kësaj force, që tashmë bëj 10 vite që i jam bashkuar, ishte pikërisht fakti që unë gjeta aty shumë të rinj, shumë të motivuar, për t’u bërë pjesë e vendimmarrjes qoftë vendore apo qëndrore. Gjeta shumë të rinj të motivuar të cilët në një farë mënyre edhe mundin e tyre e gjenin të shpërblyer sepse kishin vëmendjen e lidershipit të LSI-së. Në atë kohë drejtohej nga Ilir Meta, por organizohej nga Kryemadhi dhe të dy bashkë me pjesën tjetër që ne sot mund taquajmë me një fjalë të thjeshtë që është Kryesi Ekzekutive, vëmendjen e tyre të plotë e kishin tek të rinjtë. Të rinjtë të shkolloheshin, të punësoheshin, t’iu jepeshin mundësi për bursa studimi jashtë vendit. Unë iu bashkova kësaj partie pikërisht për këtë vizion. Aty ka qenë Klajda Gjosha, aty ka qenë Erisa Xhixho, aty ka qenë Kejdi Mehmetaj, aty ka qenë Endrit Brahimllari, aty ka qenë Floida Kërpaçi, aty ka qenë Silva, kanq qenë dhe shumë të tjerë. Nuk është pak që pas 10 vitesh ti të kesh një kastë të re politike.
PARTIA E KRYEMADHIT APO PARTIA E METËS
A ndryshon LSIA si parti e drejtuar dikur nga Ilir Meta dhe prej 2016 nga Monika Kryemadhi? Silva Caka që është një zbulim i ish-kryetarit Meta nuk e ndan këtë. Sipas saj LSI është parti e një fryme bashkimi dhe organizimi dhe nuk lidhet me emrin e Metës apo Kryemadhit.
“Kur Meta u bë president në pranverën e vitit 2017 shumë nga kundërshtarët tanë thanë se në zgjedhjet e asaj kohe LSI do merrte rezultat të dobët dhe se kjo forcë do dobësohej shumë. Ne morëm 19 mandate dhe u rritëm. Edhe në këto kushte, sa herë që aludohet se Meta e dëmton LSI-në që nuk është në krye unë u them se LSI është parti gjithmonë në rritje”. Sipas Cakës sigurisht që Meta është themeluesi dhe inspiruesi i LSI por edhe kur ishte ai kryetar Kryemadhi ka qenë pjesë e rëndësishme e partisë dhe si e tillë ajo vijon të jetë edhe sot si kryetare.
Cili është ndryshimi mes partisë që drejton Ilir Meta dhe Monika Kryemadhi?
Partia që drejtonte Ilir Meta është po e njëjta parti qe drejton edhe Monika Kryemadhi. Figurat kryesore janë të njëjta, me përjashtime të vogla por nuk besoj se përbën problem.
– Që ka ndryshuar partia, ka ndryshuar.
– Në ç’kuptim?
– Figurat nuk janë të njëjta.
– Po mirë. Ju besoj jeni të ndërgjegjshëm që Ilir Meta ishte kreu i Levizjes Socialiste për Integrim por pjesën organizative e ka mbuluar gjithmonë Kryemadhi. Çfarë ishin aktivitete, çfarë ishin struktura dhe gjithçka tjetër që ndodhte në backstage ishte dora e saj. Besoj ju kaq e dini dhe jeni të ndërgjegjshëm. Thjesht, kjo formë organizmi që deri dje në kohën kur Ilir Meta ishte kryetar i Lëvizjes Socialiste për Integrim ishte e padukshme por kishte frytet sot është edhe e dukshme sepse organizatorja është vetë kryetarja e partisë.
MENAXHIMI I RESHJEVE
“LSI do ta menaxhonte më mirë situatën”. Ish-deputetja Silca Caka hodhi akuza të rënda për mënyrën se si aktualisht strukturat e qeverisjes socialiste janë duke e funksionaur duke e lidhur këtë me faktin që sipas saj shumë familje në javëne fundit e kanë kaluar natën jashtë. “Ka një keqmenaxhim të situatës dhe kjo vjen nga mënyra se si funksionon kjo mazhorancë” tha Caka.
-Për të qenë më me aktualitetin, këto ditë në Shqipëri ka patur reshje të jashtëzakonshme por jo e papërsëritshme me vitet e fundit. Ju keni qenë shumë kritikë si forcë politike për mënyrën se si po menaxhon qeveria por çfarë gjëje të mirë mund të bëjë një forcë politike nëse vjen në pushtet, pra opozita që do të bëjë më mirë se sa ajo që po bëjnë strukturat shtetërore këtë moment të qeverisura nga PS?
-Sigurisht, përmbytjet janë e treta gjë që po i ndodhin Shqipërisë në një hark shumë të shkurtër kohor dhe ka nisur me tërmetin, ku jemi sot me menaxhimin e pasojave të termetit?
-E pengoi pandemia.
-Vazhdojmë me pandeminë. Jo, nuk e pengoi. Pse kullat e larta në Tiranë, betonieret nuk i pengoka pandemia ndërkohë që rindërtimin e shtëpive të qytetarëve e pengoka pandemia? Kështu që pandemia nuk është justifikim. Pandemia ka problemin e saj, është problem më vete, nuk është justifikim, është problem më vete dhe njëkohësisht vazhdojmë dhe me përmbytjet. Nëse ne pas një viti e pak muajsh pas tërmetit të 26 nëntorit, ne ndodhemi ende në kushtet kur kemi ende qytetarë që ndodhen në çadra, që kemi ende qytetarë shqiptarë që vrapojnë dyerve të administratës për të marrë dëmshpërblimin në bazë të dëmit që iu është shkaktuar dhe janë klasifikuar DS3 DS4, pra shkallët e dëmtimeve që kanë pësuar. Nëse kemi ende qytetarë që vrapojnë ende pas tyre dhe që vazhdojnë të jetojnë nëpër shtëpi me qira që i paguajnë vetë dhe që nuk jua paguan as shteti, kjo tregon që ti ke një menaxhim të keq të situatës dhe dashakeq sepse nëse në kushtet më të vështira atmosferike në këtë të ftohtë, në këto reshje ti të lësh njerëz të cilët mund të jenë ende nëpër çadra, të cilët nuk e përballojnë dot një qira.
-A ka sot njerëz që jetojnë në çadra? Po si e kanë përballuar këtë shi që ka tre ditë që nuk pushon?
-Ka! Mbase strehohen tek të afërmit e tyre. Mbase nxjerrin ujin me kova. A është interesuar njeri tjetër përveç opozitës për këto qytetarë? Jo. Nuk ka shkuar as ministri, nuk ka shkuar as drejtori i Emergjencave Civile dhe të mos harrojmë që përpara katër muajsh, diku nga shtatori pra kur u bë një vit nga tërmeti i parë i 21 shtatorit, vetë Kontrolli i Lartë i Shtetit ka dalë me një raport që një vit pas tërmetit në Shqipëri dhe nga pasojat e para dhe nga viktima e parë këtu në Shqipëri, ne nuk kishim ende një kuadër ligjor. Nuk ka asnjë shtet në botë ku të bëjë logjikë që kryetari i Kontrollit të Lartë të Shtetit të jetë i pushtetit. Duhet të jetë i opozitës.
