Specialistët e Shëndetit Publik theksojnë se edhe pas vaksinimit duhet bërë kujdes të paktën për dhjetë ditë për t’u mbrojtur nga infektimi
Nga Fernada Cenko
Dje ka vazhduar vaksinimi në Stadiumin Kombëtar “Air Albania” por me më pak doza së ditën e hënë. Gjithësej janë injektuar 60 doza anticovid kryesisht tek epidemiologë të qarkut të Tiranës, por dhe mjekë të spitaleve Covid. Për 975 dozat e dhuruara nga një shtet i Bashkimit Europian do të zbatohet me korrektësi protokolli i kompanisë Pfizer.
Rreth 500 persona që do të vaksinohen në këtë fazë të pare, pas 21 ditësh do të marrin dozën e dytë. Specialistët e Shëndetit Publik theksojnë se edhe pas vaksinimit duhet bërë kujdes për t’u mbrojtur nga infektimi. Duhen 7 deri në 14 ditë nga doza e parë për krijimin e antitrupave. 50 mjekët që kryen vaksinën në ditën e parë, si dhe kryeministri Rama, nuk kanë shfaqur probleme shëndetësore. Këtë e konfirmoi edhe kreu i qeverisë gjatë inspektimit të vaksinimit në ditën e dytë të fushatës.
Vaksina e Pfizer po mbahet në kushte frigoriferike -80 gradë në Institutin e Shëndetit Publik. Ndërsa, për 5 ditë, ajo mund të qëndrojë në temperatura deri në 8 gradë para injektimit. Efektet anësore të vaksinës janë të ngjashme me shenjat e Covid-it, temperaturë, dhimbje koke dhe muskujsh. Këto shqetësime nuk zgjatin më shumë se 2 ditë dhe sipas ekspertëve, kryesisht shfaqen pas dozës së dytë.
Origjina e Vaksinë.
Vaksina anti-covid që ka mbërritur dhe po aplikohet në Shqipëri është prodhim gjerman i kompanisë Pfizer. Rama e përmendi edhe dje në stadiumin ‘Air Albania’ emrin e kompanisë prodhuese, por sërish nuk tha gjë për as vendin prodhues dhe as për atë që i ka dhuruar vaksinat. Por nga mediat është siguruar dokumentet e zhdoganimit të 975 dozave të para, ku vërehet se vendi i origjinës dhe i eksportit është Gjermania, ndërsa që pjesa tjetër e produkteve, shiringat, aget dhe substancat shoqëruese kanë adresën e shtetit fqinj, Itali.
Sasia e vaksinave ka hyrë në datën 11 janar nga aeroporti i Rinasit, dorazi dhe është marrë në dorëzim nga një kompani shqiptare, por ende mbetet mister emri i shtetit që i dhuroi këto vaksina. Ditën e hënë në konferencë, kryeministri Rama tha se nuk do ta tregonte emrin e tij, për shkak të ruajtjes së konfidencialitetit. Por sipas burimeve vendi i prodhimit të vaksinës është Gjermania, më saktë fabrika “Pfizer BioNtech ManufacturinG GMBH, Germany” dhe ajo është tërhequr dorazi nga autoritetet shqiptare. Shqipërisë, sipas asaj ç’ka shkruhet në dokument i janë dorëzuar 195 flakonë të vaksinës, një prej të cilëve përmban 5 doza vaksinë anti Covid.
