Nëse nuk do shkonte në kohë një anije e rojes bregdetare, gomonia me 57 persona në bord do të ishte mbytur plotësisht, duke sjellë një tragjedi të përmasave si ajo e 9 janarit në 2004, ku humbën jetën 28 persona.
Gomonia është gjetur duke pluskuar në det rreth orës 22:00 të darkës dhe ndodhej pjesërisht e fundosur në pjesën e pasme të saj. Ndërkohë dallgët kalonin mbi njerëzit dhe fëmijët e mitur që ndodheshin në bord.
“Fjala.al, zbardh skemën e trafikimit të 55 klandestinëve sirianë dhe egjiptianë, nga brigjet e Vlorës në drejtim të Italisë, ngjarja e ndodhur në 9 janar 2021, pranë grykëderdhjes së Vjosës. Në këtë çështje që fatmirësisht nuk përfundoi në tragjedi, vijon të mbetet mister se si mundën të ikin dy trafikantët shqiptarë, të cilët kishin hipur gjatë operacionit të shpëtimit në bordin e anijes së rojes bregdetare. Sipas hetimeve të kryera dhe marrjes në pyetje të kapitenit të anijes dhe stafit të saj, ata kanë deklaruar se në bord ishin prezent dhe dy shtetas shqiptarë, të cilët nuk janë parë më në anije, sapo mjeti lundrues i është afruar portit detar. Për identifikimin e tyre, policia dhe prokuroria e Vlorës janë duke kryer hetime të mëtejshme, mbi faktin se si mundën të largohen nga anija dhe më pas nga zona e kalatës së portit detar Vlorë, dy trafikantët.
Skema e trafikut të klandestinëve
Nga hetimet e kryera është provuar se çdo klandestin ka paguar, 4 deri në 5 mijë euro tek trafikantët dhe komunikimet mes tyre, është realizuar nëpërmjet një numri të kodifikuar. Klandestinët kanë treguar se janë joshur nga një grup kriminal që organizon udhëtime nga Stambolli në Greqi dhe më pas në Tiranë, dhe për këtë udhëtim ka paguar secili një shumë prej 4 deri në 5 mijë euro. Çdo person zyrat i regjistronin me numra të veçantë kodikë dhe në këmbim u jepnin emigrantëve numra telefoni për komunikim, vetëm me anë të aplikacionit “Whats App”, që posedoheshin nga persona të tjerë, që kishin rolin e orientimit të udhëtimit të emigrantëve, duke i siguruar hotele, taksi e mjete të ndryshme të transportit.
Pas mbërritjes në Tiranë, emigrantët kontaktoheshin nëpërmjet telefonit dhe më pas fizikisht, duke i strehuar në hotele të ndryshme e shtëpi të braktisura. 55 emigrantët e kapur në bordin e gomones, kanë deklaruar se kishin hyrë në Shqipëri në muajin dhjetor dhe janë strehuar në disa hotele në periferi të Tiranës dhe në brendësi të saj. Një ndër hotelet ku janë strehuar ka qënë dhe hoteli në rrugën Him Kolli “All Stars”, në pronësi të Fatos Dusha, momentalisht i arrestuar.
Në këtë hotel kanë qëndruar rreth 15 ditë dhe më pas, sërish me një fugon mallrash të mbyllur, janë dërguar në zonën e detit, me qëllim kalimin në Itali me gomone. Pasi kanë shkuar në zonën bregdetare aty janë shfaqur tre trafikantë shqiptarë me një gomone, ku 55 klandestinët kanë hipur në gomone.
Klandestinët kërkuan kthimin sërish në breg
Për gati 15 apo 20 minuta kanë lundruar dhe dolën në det të hapur. Por për shkak të dallgëve të mëdha dhe ngarkesës së madhe, gomonia ka pasur vështirësi për të ecur, duke future ujë. Klandestinët i kanë kërkuar, dy trafikantëve që të kthenin gomonen, por një gjë e tillë nuk mundësohej, pasi gomonia nuk mund të lundronte, pasi ishte mbushur me ujë.
Ndodhur në këto kushte dhe rrezikut të shtuar të mbytjes në det, dy trafikantët shqiptarë i kanë kërkuar klandestinëve që të kërkonin ndihmë në polici, duke telefonuar numrat e emergjencës së policisë. Sipas rrëfimit të tyre gomonia ka qëndruar për rreth 2 orë në det të trazuar deri në mbërritjen e anijes së shpëtimit, e cila i ka marrë në bordin e saj, ndërsa gomonia është fundosur plotësisht.
Si u zbulua hoteli në Tiranë
Policia e Vlorës ka mundur të zbulojë hotelin “All Stars” në Tiranë, pasi në telefonin e njërit prej klandestinëve është gjendur foto të ambienteve dhe një lokacion satelitor i këtij hoteli. Menjëherë një grup agjentësh kanë shkuar në hotel, duke bërë një kontroll, ku aty gjetën dhe 9 klandestinë sirianë të tjerë dhe më pas arrestuan pronarin e hotelit Fatos Dusha.
Fatos Dusha, kunati i konsulles së Indonezisë në Tiranë
Fatos Dusha momentalisht ndodhet në masën e sigurisë “arrest në burg”. Ai është kunati i Irma Kapllanit, ish-konsulles së nderit të Indonezisë në Tiranë. Njëherësh Fatos Dusha, ka nip, nga ana e gruas, Klodian Cirunën, njeriun e dënuar me 9 vite burgim për akuzën e “Mashtrimit me pasoja të rënda”, për shkak se ka mashtruar tre biznesmenë të ndërtimit, se do i nxirrte leje në bashku, pasi ishte mik dhe shok shumë i afërt me kryeministrin Edi Rama.
