Kategoria Superiore e Kampionatit Kombëtar të Futbollit ka luajtur të mërkurën pasdreke 4 takimet e para të javës së saj të 15-të dhe kryesuesja e renditjes, Vllaznia, ka vuajtur, por ia ka dalë të marrë, ndonëse në minutën e 4-t shtesë, një fitore minimale, por mjaft të vyer në Ballsh përballë ekipit vendas.
Në një takim të luftuar deri në fund dhe ku janë dhënë edhe 6 kartonë të verdhë dhe një i kuq në dëm të ballshiotëve, shkodranët ia kanë dalë ta gjejnë rrugën e rrjetës me anë të të zakonshmit, tashmë, Ardit Hoxhaj.
Goli i 8-të këtë sezon për vlonjaten, që kryeson listën e golashënuesve të Kategorisë Superiore, i ka dhënë Vllaznisë së drejtuar nga trajneri Tomas Brdariç fitoren e 11-të këtë sezon dhe e mban atë të shkëputur në krye të renditjes, me 35 pikë, 9 më tepër sesa ndjekësja më e afërt, Teuta. Kjo e fundit ka fituar në Kamëz përballë Kastriotit, me një gol të vetëm të shënuar në pjesën e dytë nga Dejvi Bregu. Skuadra e trajnerit Edi Martini ka regjistruar fitoren e dytë radhazi në kampionat, teksa të mërkurën ka mposhtur minimalisht Kastriotit, në ndeshjen e zhvilluar në Kamzë.
Durrsakët ishin dominues gjatë pjesës së parë, por pa arritur të rrezikonin seriozisht portën e krutanëve, të cilët mbroheshin mirë. Pjesa e dytë nisi aty ku u mbyll e para, me Kastriotin që priste prapa dhe kërkonte kundërsulmin. Duhet të vinte minuta e 72-të që të shikonim golin në këtë ndeshje, ku Dejvi Bregu pas një goditje dënimi të fituar nga ai vetë, gjuan bukur nga jashtë zone, për ta dërguar topin në fundin e rrjetës. Durrsakët tanimë kanë 26 pikë, 3 më tepër sesa Partizani, që ka luajtur një ndeshje më pak, ndërsa Laçi nuk shkoi dot më larg se një barazim 1-1 në shtëpi përballë Skënderbeut.
Kurbinasit vuajnë sërish me skuadrat e vendeve të fundit dhe këtë herë i ndali Skënderbeu, pikërisht në fushën e tyre. Korçarët shënuan madje të parët me Meksin dhe miqtë që e mbyllën pjesën e parë në epërsi. Por Nuabueze barazoi për vendasit nga pika e bardhë e 11-metërshit. Dy shtylla dhe një traversë e kurbinasve, që ishin të pafat dhe morën vetëm një pikë, që i mban në vend të 4-t, me 21 pikë. Ndërkaq, pavarsisht pikës së marrë, Skënderbeu mbetet në vendin e fundit, me 11 pikë, një më pak sesa Apolonia.
Kjo e fundit është mundur 1-3 në shtëpi përballë Kukësit, në takimin e fundit të së mërkurës. Pas 4 humbjesh radhazi, verilindorët rigjejnë fitoren kundër fierakëve me rezultatin 3-1. Ibraimi shënoi i pari me 11-metërsh për Kukësin, ndërsa Smaçi vendosi përkohësisht barazpeshën. Peposhi dhe Eze më pas realizuan për Kukësin dhe i dhanë 3 pikët skuadrës së tij. Java e 15-të e Kategorisë Superiore mbyllet të enjten, me derbin e madh të kryeqytetit, midis Partizanit dhe Tiranës, por që do të luhet në Stadiumin “Elbasan Arena”.
Kategoria Superiore
Java e 15-të
Kastrioti – Teuta 0-1
Shënues: D. Bregu 72′
Bylis – Vllaznia 0-1
Shënues: A. Hoxhaj 90′
Laçi – Skënderbeu 1-1
Shënues: K. Nuabueze 51’(11-m.) / J. Meksi 43′
Apolonia – Kukësi 1-3
E. Smaçi 60’ / A. Ibraimi 15’(11-m.), E. Peposhi 76’, P. Eze 82’
Nr. Skuadra N. F. B. H. Gsh-Gp Pikë
1 Vllaznia 15 11 2 2 24-9 35
2 Teuta 15 6 8 1 15-6 26
3 Partizani 14 6 5 3 21-9 23
4 Laçi 15 5 6 4 20-14 21
5 Tirana 14 4 8 2 14-9 20
6 Kukësi 15 6 2 7 18-20 20
7 Kastrioti 15 4 5 6 15-20 17
8 Bylis 15 2 6 7 11-20 12
9 Apolonia 15 3 3 9 11-28 12
10 Skënderbeu 15 2 5 8 17-31 11
