Autoriteti shëndetësor francez ka thënë se vaksina antiCOVID e AstraZeneca duhet t’u jepet vetëm njerëzve të moshës nën 65 vjeç.
Ky është rekomandimi më i fundit nga një shtet anëtar i Bashkimit Evropian që ka aprovuar vaksinën me këto kushte, duke përmendur të dhëna të pamjaftueshme për efikasitetin e vaksinës për njerëzit e moshuar.
Rregullatori i Barnave për Bashkimin Evropian ka aprovuar vaksinën Oxford-AstraZeneca për të gjithë të rriturit, por i takon secilit shtet anëtar të përcaktojë politikën e tij të përdorimit.
Vendet e Bashkimit Evropian janë përballur me kritika rreth ritmit të ngadaltë të vaksinimeve.
Presidentja e Komisionit Evropian, Ursula von der Leyen, ka qenë vecanërisht e kritikuar për menaxhimin e veprimtarisë, por, Von Der Leyen, në një intervistë të dhënë për gazetën franceze Le Monde ditën e martë u shpreh e bindur se strategjia evropiane për procesin e vaksinimt ishte ajo e duhura.
Ndër të tjera fushata e vaksinimit është ngadalësuar nga vonesat në prodhimin e vaksinave nga kompanitë AstraZeneca dhe Pfizer. Komisioni pati një debat me kompaninë AstraZeneca javën e kaluar, pasi kompania tha që nuk mund të furnizonte dozat e porositura brenda afateve të caktuara.
