Prokurorët gjermanë kanë ngritur akuzë ndaj një 100-vjeçari, i cili dyshohet se ka kontribuuar në vrasjet e kryera në kampin e vdekjes në Sachsenhausen. Ai ka shërbyer si roje në kampin famëkeq nazist ku u vranë 100 000 njerëz.
Ai akuzohet se ka bashkëpunuar në 3 518 raste të vrasjes, raporton gjermania NDR.
100-vjeçari thuhet se kishte “kontribuar me vetëdije dhe me dashje” në vrasjen e të burgosurve në Sachsenhausen, ku ai shërbeu si roje i sigurisë midis 1942 dhe 1945.
Kampi i përqendrimit i vendosur në Gjermaninë veri-lindore mbajti të burgosur rreth 200 000 njerëz, duke përfshirë disidentë politikë, hebrenj, polakë dhe të burgosur sovjetikë të luftës – përfshirë djalin e Stalinit Yakov Dzhugashvili, i cili vdiq atje në 1943.
Sachsenhausen kishte një dhomë gazi dhe një zonë eksperimentimi mjekësor midis nënkampeve të tij. Rreth 100 000 njerëz që ishin burgosur atje vdiqën, pjesërisht për shkak të sëmundjeve, eksperimenteve mjekësore dhe kushteve të padurueshme të punës skllavëruese.
Prokurorët gjermanë besojnë se ish-gardiani mund të dalë ende në gjyq pavarësisht moshës së tij të rritur. Një gjykatë lokale tani do të shqyrtojë pikërisht këtë fakt.
Zyrtarët gjermanë të zbatimit të ligjit aktualisht po hetojnë disa raste të tjera në lidhje me kampet naziste gjatë Luftës së Dytë Botërore. Të paktën nëntë hetime paraprake janë duke u zhvilluar, i tha medias lokale kreu i Zyrës Qendrore për Hetimin e Krimeve Nacional Socialiste në Ludëigsburg, Thomas Ëill.
Vitin e kaluar, një ish-roje në kampin e përqendrimit Stutthof iu dha një dënim me kusht për dy vjet për bashkëpunim në vrasjen e 5 232 njerëzve në objektin pranë qytetit të sotëm polak të Gdansk. I pandehuri ishte në të 90-at në atë kohë.
Një grua që punonte në Stutthof si daktilografe u akuzua për bashkëpunim në vrasjen e 10 000 njerëzve javën e kaluar. Media gjermane e identifikoi atë si 95-vjeçaren Irmgard F. Por mbetet e paqartë nëse gruaja, që tani jeton në një azil, do të dalë para trupit gjykues.
