Nga Fernada Cenko
Qeveria po bën gati draft vendimin për të shtyrë afatet e vlefshmërisë së kartave të identitetit. Kur na ndajnë 71 ditë nga mbajtja e ditës së zgjedhjeve qeveria Rama edhe me darkordësinë e palëve politike do të marrë vendimin për shtyrjen e vlefshmërisë së kartave të identitetit. Janë rreth 700 mijë qytetarë të cilët nuk mund të votojnë për shkak të skadencës së afatit të kartës së tyre. Që kjo përkthehet në 700 mijë votues.
Asnjë forcë politike në vend nuk i intereson që 700 mijë votues të mos marrin pjesë në procesin e votimit. Ndaj dakordësia në miratimin e vendimit nga Këshilli i Ministrave do të jetë i mirëpritur nga të gjitha forcat politike që do të garojnë në zgjedhjet e përgjithshme që do të mbahen më 25 prill të këtij viti. Qeveria është shtyrë për të marrë këtë vendim edhe nga fakti se shumë pak qytetarë po aplikojnë për tu pajisur me mjet identifikimi të ri. Kjo do të kthehet në një mbingarkesë nëse në ditët e fundit do të shkojnë të aplikojnë të gjithë ata që do të rinovojnë kartat e identitetit.
Shtyrja e afatet që nuk dihet akoma sa do e ketë vlefshmërinë do të shmangë edhe ngarkesën nëpër institucionet kyçe që bëjnë të mundur marrjen e ID-së së re si dhe në portalin e E-albania. Ndaj, duke vënë re edhe neglizhencën për të aplikuar pritet që të shtyhet afati deri pas zgjedhjeve të 25 prillit, për ti dhënë mundësi gjithë shqiptarëve të marrin pjesë në votime.
Alarmi i KQZ dhe ambasadorëve
Ditë më parë, Komisioni Qendror Zgjedhor ka ngritur alarmin duke i bërë thirrje qytetarëve të të aplikojnë për tu pajisur më kartë të re identiteti. KQZ u bëri thirrje qytetarëve që të nxitojnë për ta kryer këtë proces, pasi në javët e fundit mund të ketë mbingarkesë në aplikime. Komisioneri Shtetëror i Zgjedhjeve, Ilirjan Celibashi paralajmëroi se personat të cilëve u ka skaduar karta apo pasaporta, nuk mund të votojnë. Shqetësimin për skadencën e kartës së identitet duke humbur mundësinë për të votuar është ngritur edhe ambasadori i Bashkimit Europian Luigi Soreca.
“Rinovimi i shumë dokumenteve biometrike është sfidë e madhe. Ne i bëjmë thirrje qytetarëve shqiptarë që të rinovojnë me urgjencë kartat e identitetit përpara ditës së zgjedhjeve”, thotë Soreca. Po ashtu kryediplomatja Yuri Kim dha mesazhin për qytetarët shqiptarë që të nxitonin të pajiseshin me karta identitet. “Është shumë urgjente që të gjithë qytetarët e Shqipërisë të marrin karta të reja identiteti në mënyrë që të mund të marrin shërbime dhe të votojnë në zgjedhjet e 25 prillit. Lëshimi i letërnjoftimeve të reja biometrike është një pjesë thelbësore e marrëveshjes mbi reformën zgjedhore. Ju lutemi, mos prisni derisa të jetë tepër vonë. Merrni letërnjoftim të ri tani, në mënyrë që të mund të votoni, më 25 prill”, shkruan Kim.
Shtyrja e afateve në kohë pandemie
Precedenti paraardhës ndodhi kur filloi pandemia në vendin tonë, shqetësimi që kishin qytetarët ishte rinovimi i kartave të identitetit për të përfunduar çdo punë që kërkonte mjet identifikimi. Pra, një numër i konsiderueshëm qytetarësh nuk mund të merrnin dot shërbime pasi ID-të e tyre kanë skaduar. Po ashtu as mund t’i rinovonin pasi në planin e masave zyrat e ALEAT për karta e pasaporta ishin të mbyllura. Përballë këtij shqetësimi të qytetarëve Ministria e Brendshme përgatiti draftin për shtyrjen e afatit të vlefshmërisë për kartat e identitetit të skaduara, që iu kish mbaruar afati në atë periudhë.
Kryeministri Edi Rama nuk ka reaguar asnjëherë gjatë kësaj kohe për kartat e identitetit dhe as ju ka bërë thirrje qytetarëve për tu pajisur me to. Po ashtu as Partia Socialiste, Partia Demokratike dhe Lëvizja Socialiste për Integrim nuk kanë reaguar për të aplikuar për karta të reja. Që e gjitha kjo i ka dhënë një arsye qeverisë por edhe subjekteve politike që të mirëpresin një vendim për shtyrjen e vlefshmërisë së kartave të identitetit deri në mbajtjen e zgjedhjeve të 25 prillit.