Ministri Punëve të Brendshme Bledi Çuçi, është duke zhvilluar një vizitë në Liban, pasi qeveria shqiptare po tenton te kthejë në Shqipëri fëmijët dhe gratë, të cilat kanë mbetur në Siri.
Vizita e Çuçit në Liban është bërë me kërkesë të kryeministrit Edi Rama. Ministri Çuçi është shoqëruar në Liban nga shefi i Antiterrorit Gledis Nano, dhe qëllimi i kësaj vizite lidhet pikërisht me riatdhesimin e fëmijëve dhe grave që ndodhen në kampin e quajtur “Al Hol”.
Kujtojmë se në riatdhesimin e Floresha Rashës dhe fëmijëve të saj bashkë me Endri Dumanin, Mark Ghorayeb, konsulli i përgjithshëm i Shqipërisë në Liban pati një rol jashtëzakonisht vendimtar që ky operacion të përfundonte me sukses. Ndërsa, vetë kryeministri Edi Rama shkoi në Liban për të marrë Floresha Rashën me tre fëmijët e saj dhe një djalin 13 Endri Dumani.
Po ashtu, pas publikimit të historisë së vogëlushit, Alvin Berisha nga emisioni investigativ italian “Le Ienne”, me ndihmën e gazetarëve, pas pesë vitesh kërkimeve në fund, i ati i dëshpëruar Afrim Berisha, arriti të depërtonte në kampet e Sirisë dhe takoi të birin, ku dhe u mundësua bashkimi i djalit me familjen që ndodhej në Itali. Mendohet se në kampet e Sirisë ndodhen mbi 50 gra dhe fëmijë, të cilët janë në pritje të riatdhesimit të tyre në Shqipëri.
