Joan Laporta është zgjedhur president i ri i Barcelonës, pas fitores bindëse në zgjedhjet presidenciale të 7 marsit në klubin katalonas.
Laporta mposhti dy kundërshtarët e tij Victor Font dhe Antoni Freixa, duke fituar 54.28% të votave të dielën. Ai arriti të fitojë 30.184 vota në total, duke lënë shumë prapa Fontin me 16.679 vota dhe Freixan me 4.769 vota.
Laporta do të jetë presidenti i 41-të në historinë e klubit të Barcelonës dhe ky do të jetë mandati i tij i dytë si president. Nga viti 2003 deri më 2010, Laporta korri suksesin më të madh si president duke fituar: 4 tituj në La Liga, 1 në Kupën e Mbretit, 2 në Ligën e Kampionëve dhe 1 në Kupën e Botës për Klube.
Ai është dhe një nga Presidentët që ka sjellë emra të mëdhenj në klub si Ronaldinho, Eto’o, Henry apo edhe vetë Messin. Ky i fundit u duk shumë i lumtur nga rikthimi i Presidentit në krye të klubit, aq sa shkoi edhe votoi me djalin e tij.
Marrëdhënia e Messit me Barcelonën tashmë pritet të konsolidohet edhe më shumë, pasi ngërçi më i madh mes tyre quhej Bartomeu.
Pasi gjithçka u vendos dhe Laporta doli fitues, ai dha një deklaratë të fortë në lidhje me yllin argjentinas. Ai tha se Messi e ka telefonuar atë dhe ia ka uruar fitoren, por Laporta shton se ai dhe argjentinasi do të bisedojnë së bashku në lidhje me të ardhmen në Barcelonë.
“Messi më uroi dje, së shpejti do të kemi një bisedë të qetë dhe do të vendosim për të ardhmen e tij dhe klubit”, tha Laporta.
