Ministrja e Shëndetësisë, Ogerta Manastirliu, ka reaguar pasi Agjencia Europian e Barnave (EMA) tha se vaksina e AstraZeneca është e sigurt dhe efektive.
Me një shënim në facebook, ndërsa shpërndanë një pjesë nga vendimi i EMA, ministrja thotë se efektiviteti i vaksinës kundër COVID të kësaj kompanie është në fakt edhe më i lartë se ai i treguar gjatë testeve.
“PO NDODH EMA (Autoriteti Rregullator i Barnave i Bashkimit Evropian): “Kemi mbërritur në një konkluzion të qartë shkencor. Astra-Zeneca është një vaksinë e sigurtë dhe efektive. Përfitimet janë shumë herë më të mëdha se sa risqet. Vaksina nuk shoqërohet me një rritje të rrezikut të përgjithshëm të ngjarjeve tromboembolike ose mpiksjes së gjakut. Provat në botën reale, sugjerojnë që vaksina ka një efektshmëri edhe më të lartë se sa ajo e treguar gjatë testeve.”, shkruan Manastirliu.
Agjencia Evropiane e Barnave doli sot në konkluzionin se vaksina AstraZeneca është e sigurt duke rekomanduar përdorimin e saj.
Sipas EMA, vaksina “AstraZeneca” do të vazhdojë të injektohet, pasi nuk paraqet asnjë rrezik për qytetarët.
