Nga Plator Nesturi
Një nga çështjet që nuk është cekur fare në këtë fushatë zgjedhore është ajo e rendit. Opozita mund të ketë trysnuar në çështje të ekonomisë sidomos pas goditjeve nga pandemia, në çështje të punësimit apo të arsimit, por asnjëherë akuza ndaj punës së organeve të rendit. Në fakt, problemet e rendit dhe të sigurisë publike kanë qenë refrene të zakonshme në fushatat elektorale. Çdo opozitë i ka përdorur dikur dhe në fakt kishte shumë çfarë të kërkoje prej uniformave blu për sigurinë në vend. Ndoshta i kemi harruar, por ka patur fushata elektorale që strategjinë për zgjedhjet e kishin ngritur pikërisht mbi katë temë. Veprimet e fundit në goditjen e krimit janë një tregues pozitiv për çfarë ka ndryshuar sidomos kur ka vullnet politik për të luftuar kriminalitetin e kontrabandën. Suksesi i SPAK dhe i policisë në zbulimin dhe goditjen e bazave të armatimit të krimit të organizuar ish një pasqyrë që i dëshmoi opinionit publik se sa thellë dhe aktiv është krimi në vend dhe që ka shumë punë për të goditur atë. Ndërkohë shpejtësia në zbardhjen e shpejtë të shumë krimeve me pasoja të rënda, si dhe bllokimi në dy raste të portin e Durrësit të sasive befasuese të kokainës në kontenierë bananesh, dëshmoi se organet e rendit kanë një hop cilësor e më aktiv në punën e tyre. Rreth 200 kilogram kokainë e që vijnë nga Ekuadori, tregojnë jo vetëm fuqinë ekonomike të krimit por dhe lidhjet e rëndësishme që ka krijuar në trafikun ndërkombëtar. Fuqi e cila jo rrallë herë është përdorur për të influencuar dhe në balancat politike e në trafiqet e influencës së fushatave elektorale. Bllokimet e sasisë së drogës ndodhin pikërisht gjatë kohës së fushatës, kohë kur dhe vëmendja e organeve të rendit është më e përqendruar tek siguria në aktivitetin zgjedhor. Por si goditje vlen dhe në ecurinë e vetë fushatës elektorale nëse mendon se një pjesë e këtyre parave nga ky aktivitet kriminal, mund të përdoren dhe nga segmente të caktuar të politikës për ta hedhur në zgjedhje, për blerje apo për ndikim e trafik influence. Në të gjitha rastet këto goditje jo vetëm i shtojnë pikë sigurisë së vendit por ngrenë dhe kredencialet e policisë së shtetit në menaxhimin me sukses të situatës zgjedhore dhe mënjanimin e çdo eksesi. Pavarësisht se nga vjen dhe çfarë skenari ka.
