Nga Fernada Cenko
Gjatë fushatës për zgjedhjet e kryetarëve të bashkisë, kryeministri Edi Rama premtoi më 9 qershor 2019 se do të përfundonte Rruga e Arbrit në vitin 2021. Edhe dje në Burrel, Rama u shpreh se Rruga e Arbrit do përfundojë plotësisht në pranverën e vitit 2021. Kreu i qeverisë tha ndër të tjera se ndryshe nga politikanët e tjerë, këtë herë erdhi me këtë lajm të mirë për burrelasit dhe për shqiptarët.
“Përpara se të vinim këtu bëmë një vizitë në kantierin e Rrugës së Arbrit dhe më behet qejfi se ndryshe nga politikanët që kanë ardhur këtu për t’ju kërkuar votat, unë sot ju them dhe jam këtu se rruga e Arbrit po bëhet dhe deri në pranverën e vitit 2021 do bëhet. Me Dionisin, kemi bërë një zgjedhje të duhur për t’ju dhënë një shtysë“, tha Rama.
Kryeministri Edi Rama ka publikuar një video në Facebook, me pamje nga rruga e Arbrit. Ai shkruan se edhe pak ngelen nga koha kur kjo ëndërr 100-vjeçare të bëhet realitet, ndërkohë që në video shihet tuneli i këtij aksi rrugor që ende është në ndërtim e sipër. “Për Dibër nga Rruga e Arbrit. Edhe pak dhe ëndrra 100-vjeçare është realitet”, shkruan Rama.
