Të martën e javës që vjen, pritet të mblidhet Kuvendi i Shqipërisë i cili u zgjodh në zgjedhjet e 25 prillit ku fitues doli Partia Socialiste. Në rendin e ditës janë renditur 27 pika kryesore, të cilat do të diskutohen në foltoren e Kuvendit.
Rendi i ditës fillon me një akt normativ për disa ndryshime për buxhetin e vitit 2021, të ndryshuar. Më pas rendi i ditës vijon me aktin normativ për “Për miratimin e tekstit të marrëveshjes, ndërmjet Ministrisë së Shëndetësisë dhe Mbrojtjes Sociale, ministrit të Shtetit për Rindërtimin dhe Institutit të Shëndetit Publikdhe distributorit të autorizuar ‘Keymen Ilaç Sanayi ve Ticaret’, A.S, për furnizimin e Republikës së Shqipërisë me vaksinën e inaktivizuar kundër COVID-19 (Vero Cell) Coronavax, të krijuar nga Sinovac Life Science Co, Ltd., dhe të prodhuar në Republikën Popullore të Kinës”.
Ndërkohë në pikën 6 të rendit të ditës është parashikuar diskutimi për aktin normativ për letërnjoftimin elektronik të shtetasve shqiptarë. Ndërsa në pikën 8 do të diskutohet rreth pajisjes së shqiptarëve me pasaportë për jashtë shtetit.
Në pikën 10 të rendit të ditës, do të diskutohet rreth prurjes së vaksinave të Pfizer në vendin tonë. Konkretisht “Për një ndryshim në aktin normativ nr. 1, datë 10.1.2021, të Këshillit të Ministrave, ‘Për miratimin e tekstit të marrëveshjes për prodhimin dhe furnizimin nga dhe ndërmjet PFIZER EXPORT B.V. dhe ministrisë së Shëndetësisë dhe Mbrojtjes Sociale të Shqipërisë, Institutit të Shëndetit Publik dhe ministrit të Shtetit për Rindërtimin, autorizimin e procedurës për lejimin e hyrjes dhe administrimit të vaksinave ANTICOVID-19 në Republikën e Shqipërisë, si dhe përdorimin e tyre në popullatë”, miratuar me ligjin nr. 2/2021’, të ndryshuar”.
Ndërkohë nga pika 15 e rendit të ditës deri në pikën 26 do të diskutohet për dekretet e kthyera në Kuvend nga Presidenti Ilir Meta./Mcntv.al
