Nga Plator Nesturi
Edhe në ditën më të keqe, ndërsa në sallën e parlamentit diskutohej për ngritjen e Komisionit Hetimor për shkarkimin e Presidentit, PD e la të vetëm Metën. Sekretari i Përgjithshëm i PD deklaroi se çështja e shkarkimit të Presidentit bëhet për të tërhequr vëmendjen nga masakra elektorale. Gjithësesi asnjë qëndrim për vetë Presidentin, as për procedurën dhe as për akuzat e shkeljes së Kushtetutës nga ana e tij. Një shpërfillje totale të një beteje të cilën Presidenti duket se do ta luajë vetëm me këshilltarët e tij. Deklarata e Bardhit, e cila vinte pas ftesës së Ballës në kuvend që dhe PD ti bashkohej nismës së shkarkimit të kreut të shtetit, nuk mund të ish më indiferente se kaq për fatin e Presidentit. Njëkohësisht dëshmoi se PD e ka kthyer me vështrimin te vetja duke lëpirë plagët e saj pas humbjes sërish të thellë në zgjedhjet e 25 prillit. Proceset që kanë nisur në gjirin e demokratëve e bëjnë ende të paqartë të ardhmen e partisë më të madhe të opozitës. Shtimi i zërav e kundër deri në krijim grupimesh të figurave të ndryshme drejtuese që kërkojnë fillimisht dorëheqjen e Bashës si kryetar, si hap i parë për ti hapur udhë një procesi reformimi të plotë të të djathtëve, duket se po bëhet gjithmonë e më trysnues. Nga ana tjetër Basha dhe mbështetësit e tij, duket se duan të mbahen fort tek alibia e vjedhjes së rezultatit të zgjedhjeve, si një mënyrë për të amortizuar pakënaqësinë ndaj lidershipit dhe kërkesës për dorëheqje. Për këtë po fitohet kohë me shpalljen e fillimit të nje turi takimesh, që ende nuk dihet kur do nisë, nëpër qytetet të ndryshme anembanë vendit. Dhe, nga sa është deklaruar të paktën, ky tur takimesh nuk do jetë për të marrë në analizë të metat e fushatës me bazën e partisë, por thjesht për të mbledhur provat për manipulimin e votës. Thua se provat nuk vijnë në Tiranë, por duhet që Basha ti mbledhë me kosh fluturash nga njëri cep i Shqipërisë në tjetrin. Ka një amulli pra, se çfarë do përvijojë fati në oborrin e selisë blu. Të gjitha opsionet janë të hapura dhe mesa duket faktorët e jashtëm do të jenë ata që do të përcaktojnë se nga do të anojë suskesi në këtë përplasje të brendshme. Ajo që është e sigurtë është se në shtator deputetët e PD do të zenë vend në parlament, pavarësisht qëndrimeve kryeneçe të momentit. Vetë kundërshatërt e Bashës as e vnë në dyshim faktin se PD ka humbur dhe PS ka fituar.
