E shtuna e 15 majit po afron për më shumë se 2 miliardë përdorues të WhatsApp. Ajo ditë është afati i fundit që klientët e saj të pranojnë termat dhe kushtet e reja të përdorimit të propozuara nga kompania, të njëjtat që shkaktuan një valë kritikash kundër platformës në fillim të këtij viti.
Polemika ka të bëjë me privatësinë: miratimi i këtyre kushteve të reja do të thotë të pranosh që aplikacioni ndan të dhëna të caktuara me Facebook , kompania mëmë e shërbimit të mesazheve. Dhe nga ana tjetër Facebook mund të bëjë biznes me ta.
Kompania ka siguruar që kushtet e reja nuk do të kenë efekte praktike në privatësinë e banorëve të një vendi anëtar të Bashkimit Evropian, sepse Rregullorja e Përgjithshme e Mbrojtjes së të Dhënave (RGPD) parandalon që të dhënat të ndahen me Facebook.
Por, edhe kështu, ata që nuk e pranojnë azhornimin e ri, edhe nëse janë në BE, do të fillojnë të kenë një shërbim të kufizuar nga data 15 maj. Për shembull, ata nuk do të jenë në gjendje të hyjnë në listën tuaj të bisedave kur hapin aplikacionin. Ata, sigurisht, mund t’u përgjigjen thirrjeve, video-telefonatave për momentin si dhe të lexojnë mesazhet.
Sidoqoftë, pas disa javësh “me funksionalitet të kufizuar”, situata e përdoruesit që nuk ka pranuar, do të jetë e komplikuar.
“Ju nuk do të jeni në gjendje të merrni thirrje hyrëse ose njoftime dhe WhatsApp do të ndalojë dërgimin e mesazheve dhe thirrjeve në telefonin tuaj”, shpjegon kompania. Në një moment, dhe pasi të marrin njoftime gjithnjë e më këmbëngulëse për të marrë një vendim, përdoruesit do të duhet të pranojnë kushtet e reja ose ata nuk do të jenë në gjendje të përdorin “fare” WhatsApp. Për më tepër, nëse një përdorues nuk e përdor platformën për më shumë se 120 ditë, llogaria do të fshihet “në mënyrë që të ruajë sigurinë, të kufizojë mbajtjen e të dhënave dhe të mbrojë privatësinë e përdoruesve”.
Problemet në Gjermani
Jashtë Bashkimit Evropian, të dhënat që WhatsApp do të ndajë me kompanitë e Facebook nuk përfshijnë përmbajtjen e bisedave të përdoruesve, pasi që këto janë të koduara dhe as kompania nuk ka qasje në to.
Por ajo që përfshihet është informacioni që lidhet me llogarinë e secilit përdorues dhe përdorimin e bërë të shërbimit. Për shembull, numri i telefonit, transaksionet e kryera, celulari i përdorur, adresa IP. WhatsApp gjithashtu tregon se të dhëna të tjera të përmendura në seksionin “informacion që ne mbledhim” të politikës së tij të privatësisë mund të ndahen , por nuk përcakton se cilat. Këto të dhëna variojnë nga emri i profilit deri te lidhjet ose vendndodhja.
Megjithëse politika e re WhatsApp nuk prek privatësinë e klientëve të saj evropianë, Komisioneri i Hamburgut për Mbrojtjen e të Dhënave dhe Lirinë e Informacionit në Gjermani, Johannes Caspar, ka qenë i bindur se ka probleme që ajo të hyjë në fuqi. Për këtë arsye, ajo ka lëshuar një “ndalim emergjence” prej tre muajsh në të cilin kompania nuk lejohet të “vazhdojë me mbledhjen e të dhënave” dhe ka kërkuar që rregullatorët e Bashkimit Evropian ta shtrijnë këtë masë në pjesën tjetër të Shteteve Anëtare.
