Deputeti i zgjedhur i PD, Xhelal Mziu ka folur sërish rreth deklaratës shokuese që bëri gjatë fushatës zgjedhore, ku kërcënoi se çdo person që do të blejë vota do e pësojë si Pjerin Xhuvani, i cili mbeti i vrarë në Elbasan.
Gjatë një interviste për Report Tv, Mziu deklaroi se deklarata e tij ishte emocionale dhe ka patur ndikim.
Mziu u shpreh se gjithçka e bëri për t’u dhënë zemër demokratëvë.
“Fenomene që kanë ndodhur në zgjedhje, kanë qenë sekondare. Platforma e Bashës, ka qenë më mira që ka prodhuar ndonjë forcë politike në këto 30 vite. Por deklaratat kanë ndikuar shumë. Për Dibrën kanë qenë më qindra socialiste që na janë bashkangjitur, por deklarata ka pasur ndikim. Ishte një deklaratë emocionale, por ishte dhe për t’u dhënë zemër demokratëve. Por edhe ndjesa ishte e ardhur nga unë personalisht jo e ardhur nga persona të tjerë. Por më shqetësuese është të prodhosh një qeveri me para të krimit dhe korrupsionit.”, u shpreh deputeti i zgjedhur i PD.
Ish-kryebashkiaku i Kamzës deklaroi se opozita u provokua dhe pati raste të blerjes së votës, por pavarësisht kësaj PD nuk “u hakmor”
“Pas katër orësh të deklaratës sime kemi kapur 4 persona që shpërndanin para dhe ne u treguam shumë paqësore. Ne mund të hakmerreshim, por kam qenë unë garanti i kësaj ngjarje që mos të ndodhte asnjë incident. Qeveria e ka provokuar ndjeshëm opozitën. Policia duhet të ishte koherente dhe të parandalonte çdo lloj ngjarje. Propaganda që përdori kjo qeveria ka luajtur rolin e saj sepse nuk duhet të kalojnë pa zhurmë instrumentet që përdori qeveria për të tjetërsuar votat.’- tha Mziu.
