I nxehti afrikan ka pushtuar Shqipërinë ditët e fundit dhe për t’i bërë disi ballë vapës zgjidhja më e mirë është bregdeti. Për fatin tonë të mirë riviera e pasur shqiptare na ofron një larmi vendesh ku mund të pushojmë buzë ujërave të Jonit ose Adriatikut.
Megjithatë, i nxehti afrikan duket se ka depërtuar edhe përtej resorteve apo lokaleve në kasat fiskale të lokaleve në bregdetin shqiptar, pasi faturat që ato nxjerrin janë tejet përvëluese për xhepin e qytetarëve. Në Dhërmi, në rast se dëshironi të konsumoni kafe me ndonjë të afërm ose mikun tuaj dhe ta shoqëroni me ujë, duhet të paguani 10 mijë lekë.
Po po mirë e lexuat, 10 mijë lekë. Nëse vetëm kafja e mëngjesit me ujin kushtojnë kaq, pushuesit nga fatura e drekës duhet të përgatiten për ndonjë shifër me shumë zero nga pas. Mesa duket pronarët e lokaleve në Dhërmi kanë vendosur të rivalizojnë ujërat e kripura të detit Jon që kanë përballë, me fatura ‘të kripura’.
Si çdo verë çmimet në bregdetin shqiptar kapin shifra të frikshme, por mesa duket Dhërmiu e ka nisur vrrullshëm këtë sezon dhe synon të kapë stratosferën me shifrat e tij. E këto ditë, sikur të mos mjaftojë i nxehti afrikan që po përvëlon vendin, faturat në Dhërmi po shkaktojnë ‘djegie të gradës së tretë’ në xhepat e qytetarëve.
