Ministri i Mbrojtjes, Niko Peleshi ka bërë me dije se si paraqitet situata në vend si pasojë e zjarreve.
Përmes një postimi në rrjetet sociale, Peleshi shkruan se zjarri në fshatin Dukat, nuk paraqet rrezikshmëri për Pararkun e Llogarasë, teksa shton se banesat në fshatin Thirrë, në Munellë-Domgjon të Mirditës janë të sigurta.
Ndërsa ka bërë një bilanc të situatës, ministri i Mbrojtjes tha se zjarri në malin e Tomorrit është arritur të izolohet teksa ka shtuar se një vatër e re zjarri është njoftuar në vendin e quajtur Qafa e Tërkuzit në pjesën e Republikës te Malit të Zi, në afërsi të kufirit me Shqipërinë, ku në ndjekje të situatës kanë shkuar menjëherë forcat zjarrfikëse të Kukësit.
Njoftimi i plotë i Ministrit:
Pas një pune të palodhur të forcave në terren dhe nga ajri, në kooordinim me Agjencinë e Mbrojtjes Civile zjarri në fshatin Dukat i Ri, nuk paraqet aktualisht rrezikshmëri në drejtim të Parkut Kombëtar të Llogarasë.
Pa rrezik për banesat janë edhe vatrat në fshatin Thirrë, në Munellë-Domgjon të Mirditës. Po vijon puna për mbajtjen nën kontroll të zjarrit mbi tunelin e Kalimashit.
Ndërsa është izoluar në pjesën më të madhe zjarri në masivin me pisha në Krushovë të Voskopojës
U arrit të izolohej në kohë të shpejtë zjarri në malin e Tomorrit dhe po monitorohen disa vatra në fshatin Corrush në Mallakastër, në fshatin Bogë në qarkun e Shkodrës.
Një vatër zjarri e re është njoftuar në vendin e quajtur Qafa e Tërkuzit në pjesën e Republikës te Malit të Zi, në afërsi të kufirit me Shqipërinë, ku në ndjekje të situatës kanë shkuar menjëherë forcat zjarrfikëse të Kukësit.
