Sfida mes Liverpool dhe Chelsea, e vlefshme për javën e 3-të në Premier League është mbyllur në barazim 1-1. Ndonëse skuadra e Tuchel luajti më shumë se 45 minuta me një lojtar më pak, përsëri ia doli të largohet nga “Anfield” me 1 pikë.
Londinezët kaluan të parët në avantazh me Havertz, i cili pas një krosimi nga goditja e këndit, gjuajti bukur me kokë, duke e ndalur topin në fundin e rrjetës në minutën e 22-të.
Baraspesha u vendos në fundin e pjesës së parë. Ishte Salah i cili ktheu në gol një penallti të shkaktuar nga James. Madje ky i fundit u ndëshkua edhe me karton të kuq, duke e lënë Chelsean me 1 lojtar më pak gjatë gjithë pjesës së dytë.
Në 45 minutat e dyta, Liverpool e kërkoi me ngul golin e fitores, madje i shkoi shumë afër në disa raste, por Mendy me ndërhyrjet e tij vendimtare, nuk lejoi që skuadra e Klopp të kalonte në avantazh.
