Policia e Selanikut ka kapur një sasi prej 50 kilogramësh kanabis, të cilat një grup shqiptarësh ishin duke u përpjekur që t’i fusnin nga Maqedonia e Veriut në Greqi.
Mediat greke raportojnë se ka të dhëna që origjina e kanabisit të jetë nga Shqipëria, por ajo nuk është tentuar të futet direkt përmes kufirit për shkak të forcave të shtuara të policisë në të dyja anët e tij.
Rrjedhimisht sipas mediave greke, trafikantët shqiptarë kanë hapur një rrugë tjetër, e cila nis nga Shqipëria, në Maqedoni dhe më pas në Greqi.
Krahas lëndës narkotike, policia greke ka arrestuar edhe dy persona me origjinë nga Shqipëria, të cilët po organizonin trafikun
E gjithë linja e trafikut të shqiptarëve u zbulua nga një agjent i infiltruar, i cili i dha garanci trafikantëve që do të çonte lëndën narkotike nga kufiri në një zonë më në brendësi të territorit grek.
Agjenti i infiltruar, me emrin “Pavlos” lidhi fillimisht kontakt me një shqiptar të quajtur “Nikos”, të cilit fillimisht i fitoi besimin.
Tre muaj pas këtij kontakti, pikërisht paraditen e sotme ai mori përsipër që të fuste brenda territorit grek sasinë prej 50 kg të lëndës narkotike. Ata ranë dakord për një pagesë prej 3 mijë eurosh për këtë shërbim.
Por, pasi ranë dakord dhe shqiptari nxorri nga makina kanabisin për t’i futur në makinën e policit, një numër i madh agjentësh policie mbërritën aty duke bërë arretimin e tij. Krahas tij u kap edhe një tjetër bashkëpunëtor.
