Sot Ermal Meta do të mbajë koncertin e tij në Shqipëri, me premtimin se ky do jetë më i miri që ka zhvilluar gjatë gjithë karrierës . Në këtë koncert që pritet të nisë në orën 19:00, Meta ka zbuluar se do të këndojë edhe shqip, një surprizë kjo që ka përgatitur për publikun shqiptar të cilin e ka konsideruar si më të veçantin, kjo për shkak të lidhjes së ngushtë që ka me Shqipërinë, vendin ku u lind dhe u rrit.
Sot në prag të koncertit, Ermali është takuar me kryeministrin Edi Rama, të cilit i ka dhuruar edhe librin e tij me piktura.
“Super Ermal Meta e nis turin nga Tirana drejt Italisë. Ishte kënaqësi e posaçme që i ra rruga nga zyra ime, ku u ndal për një bisedë të këndshme”, shkruan Rama.
Ermal Meta do të këndojë sot në stadiumin “Air Albania” në Tiranë, ku koncerti pritet të fillojë pasdite në orën 19:00. Më herët, në konferencën për shtyp, i shoqëruar nga kreu i Bashkisë së Tiranës, Erion Veliaj, Meta u shpreh dje se pavarësisht se nuk është hera e tretë që këndon në Shqipëri, i duket si hera e parë dhe se po dridhej nga emocionet. Ai tha se do t’i ‘shkrijë’ të gjitha energjitë në skenë, ndonëse për të është hera e parë që do të bëjë një koncert në stadium.
Ermal Meta, i cili jeton dhe ushtron veprimtarinë e tij artistike në Itali, rikthehet pas tri vitesh në turin e tij të ri muzikor në Tiranë. Pas shumë muajsh pauze prej pandemisë, Ermali ka vendosur të kryejë turin e tij të parë muzikor. Një turne i cili do t’i japë fund mungesës së koncerteve, por në të njëjtën kohë do të ketë një rëndësi emocionale për këngëtarin prezenca e tij në Shqipëri.
