Përfaqësuesi ligjor i Fatmir Mediut, Ardian Visha e ka cilësuar një antikushtetues vendimin e Apelit të GJKKO për të rihapur dosjen “Gërdeci”.
Për Vishën është hera e parë që një gjyqtare e një gjykate të nivelit më të ulët prish vendimin e Gjykatës së Lartë.
Ai thekson se një reagim me transparencë do të ketë pasi pala mbrojtëse të njihet me arsyetimin e vendimit.
Ditën e sotme, Apeli i GJKKO i hapi rrugë rihapjes së dosjes “Gërdeci” dhe gjykimit të ish-ministrit të Mbrojtjes, Fatmir Mediut.
Në shpërthimin e Gërdecit vdiqën 26 qytetarë shqiptarë. Një vit më vonë Prokuroria e Përgjithshme ngrit akuza ndaj Mediut dhe kompetencat i mori Gjykata e Lartë pasi gjykonte personat me imunitet. Kolegji Penal vendosi pushimin e çështjes së Mediut.
13 vite më vonë familja Durda e cila humbi djalin e mitur nga shpërthimi depozitoi kërkesën për rihapje të procesit gjyqësor. Kërkesa u pranua nga SPAK. Kjo e fundit iu drejtua Gjykatës së Lartë, por ajo ia kaloi GJKKO.
NJOFTIMI NGA PËRFAQËSUESI LIGJOR I FATMIR MEDIUT
Deklaratë
Ne cilësinë e përfaqësuesit ligjor të z.Fatmir Mediu shpreh si më poshtë:
Vendimi i deklaruar në media nga Gjyqtarja e Apelit te Posaçëm, përbën një akt jo Kushtetues dhe pluri-shkelës të Konventës Europiane Për të Drejtat e Njeriut dhe një sërë ligjesh te tjera te vendit..
Ai (vendimi) përbën një pavlefshmëri absolute e në çdo rast baza motivuese e tij nuk mund të jetë kurrë ligji.
Është hera e parë në jurisprudencë kur një gjyqtare e një gjykate të nivelit më të ulet prish vendimin e Gjykatës së Lartë!!
Veç të tjerave shkelja e ligjit është e dukshme, sepse e njëjta çështje (kërkesë) është shqyrtuar dhe hedhur poshtë nga gjykata e shkalles pare dhe gjykata e apelit, Tirane në vitin 2019.
Ky vendim hapur cenon parimin e sigurisë juridike, parimin e gjësë së gjykuar, parimin e ligjit favorizues dhe për më tepër synon procedimin për një akuzë afati parashkrues i së cilës ka kaluar me kohë.
Pasi të njihemi me “ arsyetimin” e ketij akti te paligjshem, do reagojmë me transparencë e me te gjitha mjetet ligjore të përshtatshme.
Avokat Ardian Visha