Koloneli Dritan Demiraj, i cili ka shërbyer edhe si ministër i Brendshëm i për një periudhë të shkurtër, kërkon që politika të largojë duart nga policia.
Demiraj tha në “Zona Zero” në Top News, se policia shqipare ka nevojë të riformatohet dhe të punojë e pavarur nga politika. Vrasjen e efektivit e cilësoi si tronditëse, por fatkeqësisht, ngjarje të tilla, tha ai, ndodhin edhe në SHBA, por kjo nuk do të thotë se shteti ka rënë.
“Ky është një krim i rëndë që shkakton dhimbje në të gjithë shoqërinë. Edhe në SHBA vriten shumë oficerë policie dhe kjo nuk do të thotë se shteti nuk funksionon.
Disa probleme me policinë në Shqipëri qëndrojnë. Policia në fakt ka nevojë për të nxjerrë disa mësime. Duhet një analizë e thellë e të gjithë zinxhirit komandues të policisë. Është koha që Rama të dalë krah ministrit të brendshëm, dhe të thotë që qeveria është e vendosur për të luftuar krimin.
Duhet riorganizim i kupolës së policisë. Partitë nuk duhet të konflikohen për policinë”, tha Demiraj.
Sipas kolonelit, problemi më i madh në Shqipëri është kanabizimi i vendit.
“ Në fakt problemi më i madh në Shqipëri është kanabizimi. Sa kohë qeveria e mohon, do kemi gjithnjë e më tepër probleme. PD ka nevojë për t’u përmirësuar”, tha Demiraj.
Anëtari i Këshillit Kombëtar të PD, foli edhe “luftën” në selinë blu, ndërsa pati edhe një këshillë për kryedemokratin Lulzim Basha.
“Unë ruaj respekt për Berishën, por unë bashkëpunoj me Bashën. Jam anëtar i Këshillit Kombëtar. Kam një këshillë për kryetarin e PD, ai duhet të dalë në bazë, të bashkëpunojë me njerëzit. Duhet të jetë më afër me qytetarët”, tha Demiraj.
