Nga Fernada Cenko
“Dorëheqje” ju ka mbetur emri, se gjithmonë për tu mos u shkarkuar dhe për të mos filluar “sulmet”, eprorët kërkojnë pikërisht si kokë në “faqen e ikjes”, heqjen dorë nga posti që mbajnë. Kjo si një formë për të mos “sfumuar” punën të cilën e mbrojnë gjatë gjithë kohës. Kështu ndodhi dhe me kryepolicin Ardi Veliu, i cili në nxitim e sipër, pa u konsultuar as me këshilltarët apo zyrën e shtypit, paraqiti në zyrën e Kryeministrit Edi Rama letrën e shpejtë ku shpjegonte arsyet e largimit. Që ishte dorëheqje e kërkuar, u tha nën rreshta edhe nga Ministri Bledi Çuçi: “do të prisni sa t’i mbarojë vaji kandilit” dhe ashtu ndodhi, për mos u ndezur më. Mes shumë diskutimesh, që nisnin në akuza të forta nga opozita, por jo vetëm se Veliu ishte nën ombrellën e qeverisë, largimi i numrit një të Policisë së Shtetit ishte thjesht e pritshme. Në një klimë të ashpër politike, policia asesi nuk është imune për përgjegjësinë, apo akuzat për mbajtje kahu. Duhet edhe fat ndonjëherë, por në rastin e Veliut fati nuk ishte më të. Pati protesta të shumta të opozitës përgjatë vitit 2019, po ashtu pak muaj më parë, në kulmin e ndezjes së fushatës elektorale u vra nga policia 25-vjeçari Klodjan Rasha. Për këtë krim dha dorëheqjen Ministri i Brendshëm Sandër Llkeshaj, ndërsa Veliu jo vetëm nuk u prek, por mori “bekimin” e kryeministrit për të vijuar.
Ngjarjet e fundit duket se vetëm trashnin “zullumet e paqëllimshme”, që gjithsesi në mos përgjegjësi ligjore, mbanin një hije të rëndë të përgjegjësisë morale, sidomos kur plumbat e krimit marrin jetë edhe nga radhët e Policisë së Shtetit, siç ishte rasti i nënkomisarit Saimir Hoxha. Tashmë Veliu iku duke marrë mbi veten edhe një “mllef masiv” për të cilën nuk duhet të dënohet kaq shumë. Thuajse të gjithë drejtuesit e Policisë së Shtetit nuk kanë mundur të dalin nga “kontrolli i pushtetit” të radhës. Në skenë doli Gledis Nano, i cili e zuri vetë podiumin i pari edhe nga CV-ja që kishte me vlerësime nga SHBA por edhe me mirëpritje nga opozita. Nano mori detyrën vetëm para pesë ditësh, por betejën e tij, përveç se do e ketë me luftën ndaj korrupsionit dhe krimit të organizuar, duhet ta vijojë edhe me sorollopin e politikës të çdongjyre qofshin, pasi struktura e rendit në vend funksionon me ligj të veçantë.
