Avokati i ish-kryeprokurorit Adriatik Llalla ka depozituar në GJKKO një tjetër kërkesë që klienti i tij të mos shkojë në burg. Sokol Hazizaj kërkon që dënimi me dy vite burg për ish-kryeprokurorin shqiptar të pezullohet.
Ndërkohë, 5 ditë më parë Gjykata e Posaçme kundër Korrupsionit dhe Krimit të Organizuar kërkoi që Adriatik Llalla të arrestohet dhe të dërgohet në burg. AI është larguar jashtë vendit pak ditë para se të jepej vendimi dhe SPAK e ka shpallur në kërkim ndërkombëtar.
Mirëpo, avokati Hazizaj kërkon që klienti i tij të mos shkojë në qeli edhe nëse arrestohet. Sipas tij, Adriatik Llalla vuan nga një sëmundje e rëndë, e pashërueshme, dhe burgosja e tij do i sillte pasoja të rënda për shëndetin.
Pas marrjes së kërkesës së avokatit, Apeli i Posaçëm do të mblidhet dhe do të caktojë një datë për shqyrtimin e saj. Togat e zeza do të vendosin nëse vendimi për dënim do të mbetet në fuqi apo kërkesa e avokatit Sokol Hazizaj do të pranohet dhe dënimi ndaj Llallës do të pezullohet.
Kujtojmë që Adriatik Llalla është dënuar me 2 vite burg dhe 5 vite përjashtim nga shërbimet publike, për fshehjen e pasurisë në tre episode.
