Vdekja e katër turistëve rusë pak ditë më parë në një resort luksoz në Qerret të Kavajës, vijon ende të jetë e veshur me mister dhe e pazbardhur plotësisht. Ndërkohë grupi hetimor ka propozuar të bëjë një eksperiment në pishinën e hotelit ku u gjetën të pajetë katër shtetasit rusë.
Në këtë eksperiment është kërkuar prania e ekspertëve të Institutit të Shëndetit Publik dhe të mjekësisë ligjore dhe sipas sugjerimit të prokurorisë do tentohet të krijohen të njëjtat kushte bazuar në dëshminë e punëtorit të pishinës Ndriçim Halilaga, i cili ka rrëfyer se ka tretur vetëm një gotë klor pluhur në 60 ton ujë, raporton TCH.
Po ashtu do të kërkohet ngrohja e pishinës me qëllim për të llogaritur avujt e klorit që krijohen në ambientin e brendshëm dhe se sa të rrezikshëm janë ata aq sa të kthehen në vdekjeprurës. Sakaq hetuesit kanë përjashtuar mundësinë që turistët rusë të kishin përdorur lëndë psikotrope. Viktimt ishin familjarë me njëri tjetrin, konkretisht çifti Natalia Burenkova, 58 vjeçe, Sergei Burenkov, 60 vjeç, dhëndri i tyre, Nikita Belousov, 37 vjeç, dhe vajza e tyre, Ekaterina Burenkova, 31 vjeçe. Fillimisht u tha se ata vdiqën në saunan e hotelit, por më pas u saktësua se u gjetën të pajetë në pishinën dimërore.
