Kreu i PD Lulzim Basha ka përgënjeshtuar deklaratën e bërë mbrëmjen e djeshme nga Belind Këlliçi, kryetar i Forumit Rinor të kësaj force politike, ku tha se mandati i tij ka mbaruar prej dy vitesh dhe zgjedhjet e reja janë njoftuar dje nga PD zyrtarisht.
Këlliçi njoftoi se zgjedhjet e reja do të bëheshin sepse ai i kishte informuar Lulzim Bashës se do t’i bashkohej “Foltores” së ish-kryeministrit Sali Berisha. Vetë kreu i PD mëngjesin e kësaj të shtune e quajti të pavërtetë deklaratën e Këlliçit, duke thënë se ai ka “interesa personale”.
“Jo nuk është aspak e vërtetë. Kjo është një sajesë e fabrikuar për interesa personale. Për herë të parë në drejtimin tim Forumi Rinor ka zhvilluar zgjedhje për 1 anëtar 1 votë. Prej 2 vitesh kryetarit i ka përfunduar afati dhe sërish do të zgjidhet 1 anëtar 1 votë. Interesat personale nuk pengojnë dot zgjedhjet 1 anëtar 1 votë. Është i njëti proces që është ndjekur në vitin 2014”, u shpreh kreu i PD Lulzim Basha.
Ai paralajmëroi edhe nismën e re ligjore të Partisë Demokratike
Kryedemokrati tha sot javën e ardhshme do përparohet me draftin për të përfshirë në ligjin antimafia nene kundër oligarkisë duke e lidhur me nismën tjetër të PD, atë të vettingut të politikanëve.
“Një lajm tjetër që i shtohet vettingut të politikanëve. Javën e ardhshëm ne do përparojmë me draftligjin e formuluar prej kohësh për të përfshirë në kuadrin ligjor, ligjin antimafia edhe nene kundër oligarkisë”, përfundoi Basha.
