Polica italiane shkatërroi sot një bandë që transportonte sasi të mëdha kokaine Amerika e Jugut drejt Italisë.
Guardia di Finanza e Bolonjës arrestoi 10 persona, italianë dhe shqiptarë në Macerata, Alessandria, Verona, Mantua, Reggio Emilia dhe Modena. Gjykata caktoi masat e sigurisë, ku 5 persona u lanë në burg dhe 4 në arrest shtëpie.
Mediat italiane raportojnë se operacioni ka nisur në vitin 2019 dhe është bashkërenduar nga Drejtoria e Antimafias së qarkut, që ia doli të zbulonte bandën e cila sillte sasie të mëdha kokaine përmes porteve të Evropës Veriore, kryesisht Holandës.
Në krye të organizatës ishin dy vëllezër shqiptarë, me banim në Holandë, të cilët me ndihmën e dy bashkatdhetarëve me banim në zonën e Reggios, shpërndanin kokainë në territorin italian, duke bashkëpunuar me një rrjet të brendshëm të trafikut të drogës.
Gjatë hetimeve u sekuestruan rreth 7.5 kilogramë kokainë, 93 bimë kanabis dhe 10 350 euro para cash, që dyshohet se janë pjesë e të ardhurave nga trafiku i drogës.
Gjithashtu, u sekuestruan gjashtë prona, duke përfshirë pesë automjete dhe motoçikleta, 22 marrëdhënie bankare dhe tri aktivitete tregtare, me një vlerë totale mbi 850,000 euro. Gjatë kontrollit janë gjetur edhe katër armë, dy prej të cilave janë vjedhur dhe 200 gramë kokainë shtesë.
