Presidenti i Bjellorusisë Aleksandër Lukashenko hedh poshtë akuzat se po shkakton një krizë në Europë nëpërmjet largimit të mëse 1 mijë refugjatëve nga vendi i tij. Në një intervistë për “BBC”, lideri i shtetit bjellorus theksoi se e ka marrë këtë vendim me arsyetimin se refugjatët nuk kanë ardhur për të qëndruar në Bjellorusi, por për të shkuar drejt Europës Perëndimore, ndaj nuk do të pengojë askënd.
“Nuk i ftova unë këtu. Dhe që të jem i sinqertë, nuk dua që ata të kalojnë nga Bjellorusia. Ushtarët bjellorusë të kenë ndihmuar refugjatët të kalojnë në Poloni? Mendoj se kjo është plotësisht e mundur. Ne jemi sllavë, kemi zemra. Trupat tona e dinë se emigrantët po shkojnë për në Gjermani. Ndoshta dikush i ka ndihmuar. Nuk do të merrem me këtë çështje. Nuk do të deportoj emigrantët në kufi, nuk do t’i mbaj në kufi. Dhe nëse vazhdojnë të vijnë Akoma nuk do t’i pengoj, sepse ata nuk vijnë në vendin tim, vijnë për te ju”, u shpreh presidenti bjellorusi Aleksandër Lukashenko për “BBC”.
Prej muajsh, BE-ja dhe Bjellorusia janë përplasur ashpër rreth çështjes së refugjatëve në kufirin polako-bjellorus. Madje, ministrat e jashtëm të BE-së propozuan marrjen e sanksioneve ndaj Lukashenkos dhe zyrtarëve të tjerë të shtetit bjellorus. Megjithatë, kancelarja e Gjermanisë Angela Merket bisedoi në telefon me Lukashenkon, ku i propozoi që Bjellorusia të marrë ndihma humanitare për refugjatët.
