Ministrja e Arsimit dhe Sportit, Evis Kushi ka reaguar e tronditur pas ngjarjes së rëndë të regjistruar në Lushnje, ku një 13-vjeçar ka humbur jetën duke bërë video për ta hedhur në rrjetin social Tik Tok.
Teksa thotë se është e tronditur, ministrja shkruan se këtë shqetësim e kishte ngritur edhe më parë disa here.
Sipas ministres, jo vetëm shkollat dhe institucionet, por edhe familjet dhe çdo individ duhet të marrë sot përgjegjësinë për këto raste fatale
“URGJENTE! Jam e tronditur nga ngjarja e fundit e 13 vjeçarit në Lushnje!
Aksesi i fëmijëve në internet për një kohë të gjatë dhe në informacione të pakontrolluara dhe të parekomandueshme për moshën e tyre është një nga çeshtjet që unë kam ngritur vazhdimisht në takime të ndryshme.
Edhe para pak ditësh e ngrita si alarm në takimin e zhvilluar në kuadër të projektit “Shkolla për Shëndetin” ku theksova nevojën e një debati të gjerë publik për këtë emergjencë shoqërore.
Jo vetëm shkollat dhe institucionet, por edhe familjet dhe çdo individ duhet të marrë sot përgjegjësinë për këto raste fatale”, shkruan ministrja
