Drejtori i Përgjithshëm i Policisë së Shtetit, Gledis Nano në Komisionin e Sigurisë është pyetur edhe për zbardhjen e ngjarjes së 21 janarit, ku u vranë në bulevard 4 protestues.
Për këtë, Nano nuk pranoi të japë detaje, por u shpreh shkurt: “Kjo ngjarje përbën sekret hetimor dhe kjo çështje është në hetim”.
Ndërkohë i pyetur nëse do të zhvillohen operacione të tjera për të riatdhesuar shqiptarët që ndodhen në kampet e Sirisë, Gledis Nano u shpreh i bindur se do të punohet derisa të sillet shqiptari i fundit.
“Patjetër që po, ky është një operacion në vazhdim dhe nuk do të mbarojë derisa të kthehet në Shqipëri, shqiptari i fundit. Është edhe vullnet i qeverisë. Ne i kemi dhënë provat se dimë ta bëjmë atë punë dhe do ta realizojmë. Për shkak të punës atje dhe pa cënuar sigurinë e askujt, duhet të presim pak derisa të zhvillohet operacioni i radhës”, u shpreh Nano.
Ndërsa për ardhjen e afganëve në Shqipëri, Drejtori i Përgjithshëm i Policisë së Shtetit tha se kjo nuk e ka lidhje me situatën e sigurisë në vend.
“Ardhja e afganëve për tu strehuar në Shqipëri nuk ka paraqitur ndryshim të situatës së sigurisë, pavarësisht se nga ana e policisë janë angazhuar më tepër kapacitete dhe energji lidhur me krijimin e kushteve të sigurisë dhe për vetë këta persona. Nuk ka pasur asnjë problem dhe asnjë ndikim në lidhjen e situatën e sigurisë në vend”.
