Teksa prej dy vitesh jemi në pandeminë COVID, disa sektorë janë përmirësuar sipas shifrave të INSTAT në tre mujorin e tretë të këtij viti. Sektori i shërbimeve është ringritur, i agjencive dhe bareve e restoranteve. Kjo ringritje ka ndikuar në rritjen e shitjeve, punësimit duke bërë që përmirësim të ketë edhe sektori i prodhimit.
Statistikat afatshkurtra paraqesin ecurinë e ekonomisë së vendit në periudha tremujore, nëpërmjet të cilave kuptohet zhvillimi i ciklit të ekonomisë si dhe mund të bëhen parashikime për të ardhmen e afërt. Vrojtimi tremujor ka për qëllim të paraqesë ecurinë e treguesve kryesorë ekonomikë të ndërmarrjeve ekonomike në periudha tremujore.
Baret dhe restorantet në tremujorin e tretë të këtij viti patën rritje me 18.7 për qind në shitje, 1.8 për qind rritje në numrin e të punësuarve dhe indeksi i fondit të pagave shënoi rritje 14.4 për qind, krahasuar me tremujorin e tretë të vitit 2020.
Indekset e treguesve në aktivitetin Informacion dhe Komunikacion, i cili përfshin aktivitetin e Publikimit, Telekomunikacionit si dhe shërbimet e Teknologjisë së Informacionit, në tremujorin e tretë 2021, paraqiten si
në vijim; Indeksi i shitjeve neto në volum shënoi rritje 16,9 %, numri i të punësuarve shënoi rritje 25,9 %, dhe indeksi i fondit të pagave shënoi rritje 55,1 %, krahasuar me tremujorin e tretë 2020.
