Prezenca e variantit “Omicron” duket se ka rritur ndjeshëm numrin e infektimeve në botë dhe situata duket se në disa vende po del jashtë kontrollit.
Plot 884,133 raste të reja u regjistruan në mbarë botën ditën e djeshme.
Ndërkohë, sot në Britaninë e Madhe u shënuan 119,789 raste të reja ditore dhe 147 humbje jete duke shënuar një rritje të ndjeshme në krahasim me javën e kaluar.
Në Gjermani u regjistruan 367 viktima ku një prej tyre nga varianti Omicron dhe këtë gjë e konfirmoi vetë Instituti Robert Koch. Nga ana tjetër u regjistruan më shumë se 34.000 raste të reja ditore.
Franca regjistroi ditën e saj më të keqe përsa i përket rasteve të reja me COVID-19, me më shumë se 91,000 raste të reja. Kështu dhe Italia e cila shënoi 44595 raste të reja dhe 168 viktima , që është numri më i lartë që nga fillimi i pandemisë.
Nga ana tjetër, vende si Skocia, Sllovenia dhe Greqia shtrënguan kufizimet për të parandaluar përkeqsimin e situatës. Megjithatë, ajo që kuptohet nga gjithë kjo situatë është se varianti Omicron pritet të përhapet edhe më shumë dhe qytetarët duhet të tregojnë kujdes.
