Kryetari i Partisë Demokratike, Lulzim Basha, foli pas daljes nga SPAK ku u mor në pyetje nga prokurorët belgë për çështjen e “Toyota Yaris”.
Ai tha se ishte i hapur për bashkëpunim me çdo drejtësi për të çuar hetimet deri në fund dhe për të dënuar korrupsionin.
Por Basha foli dhe i irrituar ndaj gazetarëve, të cilët donin të bënin pyetjet, ndërkohë që ai i tha t’i respektonin deklaratën dhe të largoheshin nëse nuk donin ta dëgjonin.
“Do bashkëpunoj me drejtësinë belge dhe me çdo drejtësi që lufton korrupsionin, në këtë politikë që po shkatërron ditë për ditë shqiptarët. Ky është vetëm një proces, por përmasat e krimit në Shqipëri janë unike dhe kjo është arsyeja pse shqiptarët janë të varfër, jo të lirë.
Unë dhe PD, jo vetëm jemi në dispozicion të drejtësisë belge, por drejtësisë në tërësi dhe do jemi kundër lidhjes së politikës me krimin, duan apo nuk duan të dyshuarit, të pandehurit. Kam lirinë time, nuk ma merrni dot, nëse nuk ju pëlqen deklarata ime, merrni kamerën e largohuni.
Shqiptarëve iu është thënë se çështja është mbyllur dhe se janë ndarë paratë mes politikanëve të akuzuar. Paratë janë konfiskuar, procesi vijon në Belgjikë, dhe hetimi vazhdon. Punonjësit e ndershëm të SPAK do kenë mbështetjen time dhe të PD për të vazhduar punën,” tha Basha.
