Në 11 shkurt 2013 Papa Benedikti XVI njoftoi dorëheqjen nga Papati. Ishte gati në fund të vitit të tetë të papnisë së tij. Tërheqja e tij përbën edhe rastin e parë qysh prej vitit 1294, që një Papë largohet me dëshirën e vet.
Mediat raportuan se Papa Benedikti XVI do largohej nga Papati më datë 28 shkurt. Lajmi u konfirmua nga Papa personalisht në latinisht gjatë Meshës për martirët e Otrantos. Papati thekson se vendimi i Papës vjen për mungesë të forcës së tij dhe shëndetit të lig për të vijuar me tej mandatin. Vetë, Papa sqaroi se po ndjen peshën e rëndë të drejtimit të Papatit, ndaj për këtë arsye ka medituar gjatë largimin e tij. Papa tha se e mori vendimin për të mirën e Kishës Katolike.
Kardinali Jozef Ratzinger (Benedikti XVI) ishte Papa i 265-të. Ai u zgjodh më 19 prill të vitit 2005 për të pasuar Papa Gjon Pali II. Papa Benedikt XVI, 78 vjeçar, ishte kryepeshkop i Mynihut dhe një nga anëtarët më të lartë të Kolegjit të Kardinalëve. Udhëheqja e kishës, Konklava e Kardinalëve, e zgjodhi Papën e ri në ditën e dytë të mbledhjes së tyre në Kapelën Sistine në Vatikan dhe pas katër raundesh votimi. Në Sheshin e Shën Pjetrit mijëra vetë u mblodhën ndërsa tymi i bardhë nga oxhaku i Kapelës Sistine sinjalizoi zgjedhjen e Papës i shoqëruar nga rënia e kambanave të bazilikës së Shën Pjetrit.
