Nga Emili Bibolli,
Posaçërisht per Fjala.al
Duket shenjë e mirë që çështja e inceneratorëve ka filluar të frikësojë të mëdhenj e të vegjël. Mjafton të shohësh disa fytyra apo reagime në komisionin ad-hoc për inceneratorët për të kuptuar se disa i ka mbërthyer jo pak paniku.
Foshnjë ende e brishtë është drejtësia shqiptare por deri diku po fillon të funksionojë. Toleranca dhe keqardhja ndaj të gjithë atyre që shkelin ligjin, abuzojnë me paratë e shtetit apo taksat e qytetarëve duhet të jetë zero.
Dënimi dhe prangat janë të rënda kur i mendon, por çdo njeri i logjikshëm e i ndershëm mendohet mirë për çdo hap që hedh në jetën e tij dhe llogarit gjithmonë kostot dhe pasojat e veprimeve apo vendimeve që ndërmerr.
Sigurisht, çdo abuzues dhe spekulator ndjen kënaqësi kur përvetëson ato që nuk i takojnë pa u munduar shumë, por besoj se ka ardhur momenti që këta lloj njerëzish të cilët të ngjyerën në pasurinë publike e kanë prioritetin e tyre kryesor në jetë, të provojnë njëherë edhe “kënaqësinë” e prangave në duar, për të kuptuar e mësuar se një shtet ligjor dhe demokratik funksionon vetëm në bazë të ligjeve, të cilat nuk janë bërë për t’u shkelur.
