Kriza ekonomike që ka pushtuar vendin tonë dhe mbarë botën për shkak të luftës në Ukrainë dhe sanksioneve të vendosura ndaj Rusisë kanë shkaktuar një reagim të madh nga qytetarët, por jo vetëm.
Eksperti dhe profesori i ekonomisë Adrian Civici ka folur mbi këtë çështje duke analizuar situatën e tregut dhe se çfarë parashikohet të ndodhë në të ardhmen lidhur me situatën ekonomike në vendin tonë, por edhe në tregjet e huaja.
“Duhet të kemi parasysh një gjë që edhe sot përmendet shpesh nga ekspertët. Lufta në Ukrainë, sanksionet dhe gjithë çrregullimet në nivel ndërkombëtar, e shtynë idenë se ky shok ekonomik do vazhdojë deri në fund të vitit 2022. Por ajo që është “pozitive” ndryshe nga krizat e tjera të naftës apo edhe të produkteve ushqimore, në këtë rast janë çrregulluar tregjet, nuk është se mungon nafta në treg.
Sanksionet ndaj Rusisë dhe gjithë çrregullimet kanë bërë që të paktën për një periudhë disa javore, derisa të riorganizohen tregjet mund të jetë kjo goditje kaq e madhe dhe kaq shqetësuese. Sot ndërhyrja e qeverisë duhet për të gjetur tregjet e reja.
Ka një sërë masash që unë besoj se do merren në ditët në vazhdim. Mund të fillosh që nga masat që kanë të bëjnë me lehtësirat fiskale, por ka edhe masa të tjera që po marrin vende të ndryshme. Për shembull, disa vende të Evropës po mendojnë një lloj kuote ose racioni të naftës për të konsumuar një familje, ose një biznes. Shumë vende po i kthehen atyre që quhen rezerva strategjike të karburanteve ”, u shpreh Civici.
