Dy ministrat e jashtëm ai rus dhe ukrainas do të zhvillojnë raundin e tretë të takimit për paqe në Turqi. Ditën e djeshme Rusia bombardoi spitalin e fëmilijëve në Mariupolit. Zelensky tha se fëmijët janë bllokuar nën rrënoja
Ukraina po përjeton ankthin e bombardimeve dhe vrasjen e 1,170 civilë në qytetin e Mariupolit, që nga fillimi i agresionit rus. Një agjenci shtetërore informacioni ukrainase që i referohet nënkryetarit të bashkisë së Mariupolit thotë se nga mbi një mijë të vrarët, 47 janë varrosur në një varr masiv ditën e djeshme. Ndërkohë Ukraina akuzoi Rusinë për bombardimin e një spitali fëmijësh në qytet, duke shkelur një armëpushim që ishte vendosur për të mundësuar evakuimin e qindra mijëra civilëve të bllokuar në qytet. Presidenti ukrainas, Volodymyr Zelensky, ka reaguar në lidhje me bombardimin e spitalit të fëmijëve nga ushtria ruse në Mariupol të Ukrainës. Ai thotë se fëmijët janë bllokuar nën rrënojat e spitalit, duke shpërndarë një video tronditëse që ilustron shkallën e shkatërrimit. Rusia, e cila mohon të ketë vënë në shënjestër civilët, kishte thënë se do të ndalte zjarrin për t’i lënë civilët të largoheshin nga Mariupoli dhe qytete të tjera të rrethuara të mërkurën. Organizata e Kombeve të Bashkuara ka bërë bilancin e viktimave të luftës. Që prej fillimit të hyrjes së ushtrisë ruse në Ukrainë janë lënduar në total 1.424 ukrainas, midis tyre 516 janë vrarë. Megjithatë, shifrat reale të viktimave janë më të larta. Ndërkohë mësohet se shumica e viktimave janë rezultat i bombardimeve dhe sulmeve ajrore ruse, deklaron OKB.
Takimi në Turqi mes Ukrainës dhe Rusisë
Tre ditë pas takimit të kryeministrit Naftali Bennett me presidentin rus Vladimir Putin në Moskë, detajet kanë filluar të dalin në pah. Sipas njerëzve që ishin të informuar për detaje rreth takimit, situata aktuale është se Rusia ka ofruar një version “përfundimtar” të ofertës së saj për t’i dhënë fund krizës, të cilën presidenti ukrainas Volodymyr Zelensky duhet ta pranojë ose ta refuzojë. Propozimi u konsiderua “i vështirë” por jo “i pamundur”, thanë burimet. Është më keq se ajo që do të kishte marrë Zelensky përpara pushtimit, por “boshllëqet midis palëve nuk janë të mëdha”. Putini urdhëroi forcat e tij të ndalonin – u dha komanda për një armëpushim – në mënyrë që të prisnin vendimin e Zelensky, thanë burimet. Nëse presidenti i Ukrainës e refuzon propozimin, supozimi i presidentit francez Emmanuel Macron se “më e keqja është para nesh” është e prirur të ndodhë. Në atë skenar, Putini do të urdhërojë ushtrinë e tij të vendosë pedalin në metal dhe të ndryshojë fytyrën e Ukrainës. Zelensky po lëviz shpejt, në mënyrë të pamatur, thanë burimet. Nga njëra anë, ai po gëzon një popullaritet të jashtëzakonshëm dhe është bërë si Che Guevara. Nga ana tjetër, ai e di mirë se cili ishte fundi i revolucionarit dhe liderit gueril argjentinas. Zelensky mund të forcojë pavarësinë e Ukrainës, por do të duhet të paguajë një çmim të shtrenjtë, thanë burimet. Supozimet janë se ai do të detyrohet të heqë dorë nga rajoni i kontestuar i Donbasit, të njohë zyrtarisht disidentët pro-rusë në Ukrainë, të zotohet se Ukraina nuk do t’i bashkohet NATO-s, të zvogëlojë ushtrinë e tij dhe të shpallë neutralitet. Nëse ai refuzon propozimin, rezultati mund të jetë i tmerrshëm: mijëra, ndoshta dhjetëra mijëra ukrainas do të vdesin dhe ka një probabilitet të lartë që vendi i tij të humbasë plotësisht pavarësinë e tij. Sipas burimeve të njohura për përmbajtjen e bisedimeve, udhëtimi i Bennett në Moskë nuk kishte për qëllim ndërmjetësimin mes palëve dhe zyrtarisht nuk u ofrua asnjë propozim arbitrazhi. Përkundrazi, udhëtimi kishte për qëllim të kuptonte se cili ishte pozicioni i Putinit, cila ishte gjendja e tij shpirtërore dhe cilat ishin linjat e tij të kuqe, dhe t’i raportonte ato në Perëndim. Negociatat reale, sipas burimeve, po ndodhin drejtpërdrejt mes Rusisë dhe Ukrainës dhe janë shumë më serioze se sa ka thënë Perëndimi. Kievi nuk e ka ndarë me Perëndimin atë që ka ndodhur në negociata pasi ata nuk duan të zbehin ndjenjën e emergjencës në mbarë botën. Në realitet, megjithatë, ukrainasit e dinë mirë se cilat janë kërkesat e Putinit dhe ata e dinë se do të duhet të marrin një vendim dramatik në ditët në vijim. Askush nuk do të bëjë presion ndaj ukrainasve, thanë burimet; Vendimi është i Zelenskit. Megjithatë, një gjë është e sigurt: Putini është i vendosur dhe komplikimet në rritje që nga pushtimi nuk do ta pengojnë atë. Përkundrazi, ai nuk mund të kthehet prapa, kështu që sa më shumë lufta të bëhet e vështirë dhe të shtohen viktimat, aq më shumë do të jetë nën presion për të treguar arritje të vërteta. Përshtypja është se, përkundër faktit se parashikimet për një fitore të shpejtë ndaj ushtrisë ukrainase janë vërtetuar të rreme, Putini është i vendosur si kurrë më parë. Bota është në pritje të takimit trepalësh të nivelit të lartë midis Turqisë, Rusisë dhe Ukrainës, i cili do të zhvillohet të enjten në provincën jugore Antalya, si pjesë e përpjekjeve të Ankarasë për të ndërmjetësuar midis vendeve ndërluftuese. Ministri i Jashtëm turk Mevlut Çavusoglu njoftoi takimin mes ministrit të Jashtëm rus Sergey Lavrov dhe homologut të tij ukrainas Dmytro Kuleba të hënën, duke thënë: “Ne do ta mbajmë këtë takim në një format trepalësh në Antalya të enjten, më 10 mars”. Ai do të marrë pjesë në takim pasi të dy liderët kanë kërkuar praninë e tij, tha ministri, duke shtuar se ai do të bashkojë zyrtarët e nivelit të lartë rus dhe ukrainas për herë të parë që nga fillimi i luftës më 24 shkurt. Duke shprehur shpresën se takimi do të jetë një “pikë kthese” dhe “hap i rëndësishëm” drejt paqes dhe stabilitetit, ministri i jashtëm turk tha se Ankaraja “do të vazhdojë të bëjë përpjekje për një paqe të qëndrueshme”. Që kur Rusia nisi sulmin e saj ndaj Ukrainës, Turqia ka marrë pjesë në përpjekje diplomatike aktive për të bashkuar palët përkatëse, tha Çavusoglu, duke shtuar se presidenti Rexhep Taip Erdogan ka bërë 19 telefonata me homologët e tij. “Edhe unë kam zhvilluar rreth 40 telefonata”, shtoi ministri. “Gjatë kësaj periudhe, unë fola me ministrin e Jashtëm ukrainas Dmytro Kuleba gjashtë herë dhe ministrin e Jashtëm rus Sergej Lavrov katër herë, pa përfshirë bisedën tonë me SMS”, shtoi ai. Sipas ministrit, Kuleba dëshironte një takim të drejtpërdrejtë midis presidentit Volodymyr Zelenskyy dhe homologut të tij rus Vladimir Putin, sepse ky i fundit “merr vendimet përfundimtare”. Delegacionet ruse dhe ukrainase janë takuar tri herë në qytetin bjellorus Brest, më e fundit të hënën. Delegacioni i Moskës udhëhiqej nga këshilltari presidencial rus Vladimir Medinsky, ndërsa ai i Kievit nga Mikhail Podolyak, këshilltari i Zelenskyy-t. Pas takimit, Podolyak deklaroi në Tëitter se bisedimet rezultuan në hapa “të vegjël pozitivë” në zhvillimin e korridoreve humanitare. Ben Caspit/ Maariv- The Jerusalem Post
Centrali i Çernobilit pëson “errësim të plotë”, jepet alarmi për katastrofë nga rrezatimi
Impianti bërthamor i Çernobilit ka pësuar një “errësim të plotë”, duke shkaktuar frikë nga katastrofa e rrjedhjes së rrezatimit, pasi Rusia pushtoi vendndodhjen dhe mori në kontroll centralin, shkruan “The Sun”. Operatori shtetëror i rrjetit energjetik në Ukrainë ka thënë se centrali, i cili u mor nga forcat ruse muajin e kaluar, tani nuk ka furnizim me energji elektrike. “Për shkak të veprimeve ushtarake të pushtuesve rusë, centrali bërthamor në Çernobil u shkëput plotësisht nga rrjeti elektrik. Stacioni bërthamor nuk ka furnizim me energji elektrike. Aksionet ushtarake janë në betejë, kështu që nuk ka mundësi për të rivendosur linjat. Qyteti Slavutich është gjithashtu pa furnizim me energji”, njoftojnë autoritetet ukrainase. Kompania shtetërore bërthamore e Ukrainës, Energoatom, tha se mungesa e energjisë në Çernobil rrezikon të dërgojë substanca radioaktive në ajër, sepse centrali nuk mund të ftohë karburantin e harxhuar bërthamor. Sipas kësaj kompanie, “puna për të riparuar lidhjen dhe rivendosur energjinë në central, që është pushtuar nga rusët, nuk ka qenë e mundur, sepse luftimet vijojnë ende”. Nga ana tjetër, ministri i Energjisë i Ukrainës, Herman Halushchenko, u shpreh se autoritetet ukrainase nuk e dinë se cilat janë nivelet e rrezatimit aktualisht në centralin bërthamor.
