Një ditë pasi gjykata Civile e Tiranës njohu zyrtarisht statutin e kuvendit të 11 dhjetorit, të thirrur nga ish-kryeministrit Sali Berisha, anëtarë të grupit të Rithemelimit kanë shkuar sërish në selinë e PD.
Deputeti Flamur Noka, ndërsa pa nga afër ambientet e selisë foli edhe për mediat,d uke thënë se në Partinë Demokratike ka vend për çdo qytetar të lirë. I pyetur nëse ka më vend për Lulzim Bashën tashmë në PD, Noka shtoi se kjo forcë politike është e hapur dhe se Basha do të jetë një prej kolegëve.
A ka më vend për Bashën në PD?
“Në PD ka vend për çdo qytetar të lirë të këtij vendi që nuk pajtohet me regjimin dhe është kundër këtij regjimi. Nuk do jetë më as parti e bravave dhe as e blindave, por e dyerve të hapura. Kjo force politike është e hapur për të gjithë, për Lulzim Bashën që do të jetë një nga kolegët tanë.”, tha Noka.
Më tej tha se detyra kryesore është kthimi i selisë në duart e demokratëve.
“T’ja kthejmë demokratëve, kjo është detyra jonë, këtu është boshatisur gjithçka. Dy janë mesazhet që përcjellim, ç’bunkerizimi i PD dhe i dyti është rruga me çdo demokrat nga më i thjeshti në bazë deri ke deputetët në qendër e kemi së bashku, pas bunkerizimit të partisë kjo seli do t’i kthehet normaliteti dhe do jetë e hapur për çdo demokrat. Kjo periudhë do të hidhet pas dhe i përkasë të shkuarës. Nuk do dëshiroja ta kujtonim këtë situatë do të shohim para sepse nuk mund të rrimë peng i hijeve të bunkerit, do të bashkohemi dhe beteja do të jetë për të rrëzuar një regjim që po i pi gjakun shqiptarëve dhe që nuk ekziston në asnjë vend tjetër”, tha Noka.
