Qytetarët e Shkodrës janë zgjuar të tmerruar në orët e para të mëngjesit të kësaj të shtune, si pasojë e dy shpërthimeve të fuqishme me tritol. Deri tani nuk ka raportime për persona të lënduar, por vetëm për dëme të shumta materiale.
Objekti i parë që ka shpërthyer me tritol ndodhet në Pedonalen e qytetit të Shkodrës dhe është një qendër tregtare në pronësi të Xhemal Bushatit. Ky i fundit ishte kandidat i Lulzim Bashës për Bashkinë e Shkodrës, por nuk mundi të fitonte dot në zgjedhje, duke u renditur i treti.
Pak minuta më vonë, në një hapësirë kohore prej 10 minutash, një tjetër shpërthim i fuqishëm është dëgjuar në qytetin kryeqendër të veriut. Një sasi tritoli ka shpërthyer në dyqanin e një rrjeti supermarketesh në vendin e njohur si “Rruga e Gjerë” në afërsi të stadiumit.
Paraprakisht, mësohet se shpërthimi i parë është dëgjuar rreth orës 02.20 të mëngjesit, dhe i dyti 10 minuta më pas. Nuk dihet nëse dy objektet që janë hedhur në erë me tritol kanë lidhje me njëri-tjetrin sepse u përkasin personave të ndryshëm.
Njoftimi i policisë:
“Rreth orës 02:20, në derën e supermarketit në pronësi të shtetasit F.M. në lagjen ” Kongresi i Permetit” si dhe në derën e një biznesi tjetër privat butik rrobash në pronësi të shtetasit Xh.B. në lagjen “Vasil Shanto”, është vendosur lëndë plasëse dhe si pasojë e shpërthimit të tyre kanë shkaktuar vetëm dëme materiale.
Grupi hetimor nën drejtimin e Prokurorisë vijon veprimet duke administruar çdo provë dhe duke vlerësuar çdo informacion, me qëllim zbardhjen e plotë të ngjarjeve, identifikimin dhe kapjen e autorit/ëve”, njofton Policia e Shkodrës.
