Ministri i Drejtësisë, Ulsi Manja ka deklaruar se vendi ynë do i bashkohet aleatëve perëndimorë në sanksionet për oligarkët rusë që kanë asete në Shqipëri.
I pyetur nga gazetarët nëse ka në vendin tonë asete të rusëve që mbështesin pushtimin e Ukrainës, Manja tha se vendi ynë po bashkëpunon me aleatët dhe nëse do të ketë një listë të personave të shpallur si mbështetës të luftës, do të merren masa për të vendosur sanksionet.
“Shqipëria është pjesë e grupit të shteteve që e kanë dënuar agresionin rus në Ukrainë. Bën pjesë në shtetet që kanë vendosur sanksione. Është një proces që udhëhiqet nga Ministria për Evropën dhe Punët e Jashtme. Jemi në bashkëpunim të ngushtë me aleatët tanë ndërkombëtarë. Nëse do kemi një listë të personave të shpallur si mbështetës së luftës, ne si qeveri do zbatojmë deri në fund angazhimin që kemi marrë përsipër”, u shpreh Manja.
