Televizioni shtetëror rus i ka kërkuar publikisht Putinit që të ‘fshijë MB nga harta’ me një armë nukleare nënujore.
Televizioni shtetëror rus ka lëshuar një kërcënim kundrejt Mbretërisë së Bashkuar pasi ‘kryepropagandisti’ i Presidentit Vladimir Putin, Dmitry Kiselyov, tha se ‘Mbretëria e Bashkuar duhet të jetë në shënjestër të armëve bërthamore’.
Duke lëshuar dy kërcënime, Kiselyov tha se Rusia mund të godasë Britaninë me një raketë hipersonike të njohur si Satan-2 e quajtur zyrtarisht Sarmat, ose të përdorë një dron robotik nënujor të quajtur Poseidon për të ‘zhytur Britaninë në thellësi të detit’.
Duke folur në Rossiya-1, Kiselyov tha se bomba nënujore mund të “ngrejë një valë gjigante, një tsunami, deri në 500 metra lartësi”.
Nëse ata do të shpërthenin një armë të tillë, ajo do mund të krijonte një valë baticore që do të arrinte pothuajse mbi Scafell Pike, mali më i lartë në Angli dhe do të ishte plot me material radioaktiv që do ta kthente Anglinë në një “shkretëtirë radioaktive”.
Ky kërcënim vjen pasi Boris Johnson u akuzua se sugjeroi se Britania e Madhe mund të përdorte armë bërthamore kundër Rusisë pa u konsultuar më parë me NATO-n.
Downing Street i ka denoncuar këto pretendime si “të pabaza” dhe i ka quajtur “një shembull tjetër i dezinformatave të shpërndara nga Kremlini”.
Kiselyov pretendon se Britania, e cila së bashku me shumë vende të tjera ka furnizuar me armë dhe ndihma Ukrainën, nuk mund të shpresojë që të krahasohet me Rusinë në një luftë bërthamore.
Kiselyov tha: “Dhe çfarë do të ndodhë pas fjalëve të Boris Johnson për një “goditje hakmarrëse ndaj Rusisë”?
“Pse e kërcënojnë Rusinë e madhe me armë bërthamore teksa janë vetëm një ishull i vogël? Ishulli është aq i vogël sa një raketë Sarmat mjafton për ta mbytur njëherë e përgjithmonë”.
Ai pretendoi se Britania e Madhe do të fshihej nga harta. Më pas vazhdoi: “Raketa ruse Sarmat [i njohur ndryshe si Satan-2], më i fuqishmi në botë… është i aftë të… shkatërrojë një zonë me madhësinë e Teksasit apo Anglisë. Një nisje e vetme, Boris, dhe nuk ka më Angli.”
Ai më pas shtoi: “Një tjetër mundësi për të zhytur Britaninë në thellësi të detit është droni robotik nënujor rus Poseidon. Ai i afrohet objektivit në një thellësi një kilometër me shpejtësi 200 kilometra në orë. Nuk ka asnjë mënyrë për ta ndaluar këtë dron nënujor. Ka një kokë lufte me një kapacitet deri në 100 megaton. Shpërthimi i këtij siluri termonuklear pranë brigjeve të Britanisë do të ngrejë një valë gjigante, një tsunami, deri në 500 metra lartësi. Kjo valë baticore është gjithashtu një bartëse e dozave jashtëzakonisht të larta të rrezatimit. Duke u ngjitur mbi Britaninë, ajo do ta kthejë atë që ndoshta ka mbetur prej tyre, në shkretëtirë radioaktive përgjithmonë. Ju pëlqen kjo perspektivë? Dhe Putini paralajmëroi për këtë, më 24 shkurt [nëse dikush ndërhynte në operacionin e tij special ushtarak].”
Arma Poseidon ka qenë në zhvillim prej disa vitesh tashmë, me Putin që pretendoi në 2019 se “puna po shkon sipas planit”.
Kreu i Roscosmos (agjencisë ruse hapësinore) gjithashtu u ka bërë jehonë kërcënimeve bërthamore, duke deklaruar: “Boris, nëse përdoret “Sarmat”, askush nga ju nuk do të “konsultohet me njëri-tjetrin. Dhe nuk do të ketë njeri që t’ju stilojë flokët, zoti kryeministër.”
