Emmanuel Macron është betuar sot për mandatin e tij të dytë si president i Francës në një ceremoni në Pallatin Elysee.
Në një vend ku presidentët rrallë rizgjedhen, Macron fitoi 58.5 për qind të votave në raundin e dytë në prill kundër Marine Le Pen e ekstremit të djathtë, pavarësisht kundërshtimit të fortë ndaj politikave të tij pro-biznesit dhe një propozimi për të rritur moshën e daljes në pension.
Macron gjatë fjalës së tij tha se mandati i tij i dytë do të ishte “i ri” dhe jo thjesht një vazhdim i të parit.
“Ne duhet të shpikim një metodë të re së bashku, larg traditave dhe rutinave të lodhura, me të cilat mund të ndërtojmë një kontratë të re produktive, sociale dhe ekologjike,” tha ai.
Në mesin e 500 të ftuarve të pranishëm ishin ish-presidentët Francois Hollande dhe Nicolas Sarkozy, ish-kryeministrat Edouard Philippe, Manuel Valls, Alain Juppe dhe Jean-Pierre Raffarin, si dhe liderë fetarë dhe figura të tjera shtetërore.
