Ish-deputeti Spartak Braho ka sulmuar sërish ish-kryetarin e bashkisë së Durrësit, Vangjush Dako.
I ftuar në emisionin “Frontline”, ai deklaroi se Dako ‘do ta marrë në qafë’ dhe kryebashkiaken aktuale të Durrësit, Emirjana Sako.
Ndër te tjera, ai ka publikuar një foto, në të cilën shihen duke ngrënë në një restorant Vangjush Dako, Emirjana Sako dhe disa anëtarë të PS në Durrës.
Spaho tha se këtë foto ia ka dërguar kamerieri i lokalit, duke theksuar se sipas tij, ky është sekti mafioz i Durrësit.
“Ky është sekti mafioz i Durrësit, zoti Dako i shpallur non grata, koka e mafies në Durrës. Ka mbledhur sektin e tij dhe po drekojnë në Kodrën e Kuajve në Durrës. Kjo (Emirjana Sako) është etiketuar si personi që luan me muzikën valsin e kompozuar Vangjushi. Nuk dua të jem i ashpër me të. Është arkitekte e mirë, por do e marrë në qafë Vangjushi. Ai është si miu, fshihet nëpër rrugët e Durrësit, nuk del e ka vajtur të ndyjë aktivin e partisë në Durrës. Fotografinë ma ka dërguar kamarieri i lokalit”, tha ai.
Kjo nuk është hera e parë që Braho sulmon Dakon, sidomos pas shkarkimit të djalit të tij nga posti i nënkryetarit të Bashkisë në Durrës.
Asokohe, Arbri Braho bëri një sërë denoncimesh për Dakon dhe kjo gjë mesa duket i kushtoi edhe postin e nënkryetarit. Që pas asaj kohe, sulmet e Spartak Brahos ndaj Dakos janë shtuar edhe më shumë.
Ndërkohë, Braho duket se ka pasur vërejtje edhe për kryeministrin Rama. Ai ka kërkuar nga kreu i qeverisë që t’i kursejë deklaratat ndaj SPAK.
Sipas tij, kjo praktikë është ndjekur edhe nga Sali Berisha në të kaluarën.
