Rezultatet e kombëtareve në “Uefa Nations League” dhe merkato e klubeve kryesore europiane janë në fokusin e gazetave më të njohura sportive.
Më poshtë titujt kryesorë të tyre.
“SPORT” e vendos fokusin tek merkato e Barcelonës dhe objektivat e saj, ku zbulohen edhe planet B, të katalanasve. “Koulibaly-Di Maria janë alternativat” është titulli kryesor i gazetës spanjolle.
Edhe “Mundo Deportivo” shkruan për merkaton e blaugranasve, kryesisht për objektivin Kounde për të cilin vendos titullin: “Barcelona, zgjedhja e parë”.
“Marca” ka në faqen e parë Tchouameni, blerjen më të re të Real Madrid, i cili rrëfeu: “Mbappe më ftoi të shkoja tek PSG”.
“Mbappe më ka kuptuar”, është titulli kryesor i “AS”, që gjithashtu ka në fokus intervistën e Tchouameni dhe tratativën e tij me PSG, para kalimit tek Madrilenët.
“Duhet të gjejmë një ligj të kundërt sportiv” është titulli i “L’Esportiu”, e cila i kushton faqen e parë intervistës së UFEC, Gerard Esteva.
“L’Equipe” i kushton faqen e parë futbollistes së PSG, Kheira Hamraoui e cila rrëfen vështirësitë në jetë dhe momentin më delikat kur u rrah me shufër hekuri. “Mendova se do të ngelesha atje” u shpreh ajo, që është njëkohësisht titulli kryesor i prestigjozes franceze.
“Goditësit dhe të përplasurit” është titulli i “Mirror Sport”, që nuk kishte sesi ta kalonte pa vënë në fokus humbjen shokuese të Anglise 0-4 ndaj Hungarisë në Nations League mbrëmjen e djeshme. “Tre Luanët” morën një humbje shokuese, ndërsa hungarezët një fitorë historike.
Edhe shtypi Italian, përveç merkatos vë theksin tek humbja befasuese e Italisë më rezultatin 5-2 ndaj Gjermanisë.
“Italia çfarë figure”, është titulli i “La Gazzeta dello Sport”, e cila kritikon paraqitjen e kombëtares azure, në atë humbje katastrofike.
Po ashtu, edhe “Corriere dello Sport”, faqen e parë ja kushtojn humbjes dramatike, për të cilën shkruan: “Jashtë testit”
Ndërkohë, e përditshmja torineze “Tuttosport” ka në fokus merkaton e Juventusit dhe objektivin Koulibaly, për të cilin shkruan: “Koulibaly-Juve, çelësi është Demiral”.
