Është rikthyer problemi i djegies së mbeturinave urbane në vend, veçanërisht në qytetin e Shijakut. Banorët e kësaj zone janë ankuar për rrezikun që përbën djegia e mbetjeve në hapësira publike.
Deputeti i kësaj zone dhe njëkohësisht Kreu i Partisë Agrare Ambientaliste, Agron Duka ka denoncuar këtë rast. Ai bashkohet me shqetësimin e qytetarëve dhe kërkon hetimin dhe marrjen e masave për ti dhënë zgjidhje kësaj çështjeje.
Denoncimi i plotë:
Të hetohet krimi mjedisor që u bëhet banorëve të Shijakut!
Prej disa ditësh banorët e qytetit të Shijakut dhe jo vetëm, janë duke jetuar mes smogut të krijuar nga djegia e mbeturinave urbane.
Është rikthyer e njëjta skemë, kur mbetjet digjen natën, për të mos u parë nga qytetarët.
Pamjet tregojnë renë e tymit që pushton hapësirën, duke u shndërruar në një rrezik serioz për shëndetin e qytetarëve.
Vetë banorët kanë filmuar dhe denoncojnë këtë gjendje.
Si deputet i asaj zone, unë bashkohem me shqetësimin e tyre dhe kërkoj marrjen e masave për ti dhënë fund menjëherë, kësaj praktike “menaxhimi” të mbetjeve.
Djegia e mbetjeve në hapësira publike është tashmë një krim mjedisor, ndaj dhe unë nxis organet ligjzbatuese të hetojnë për këto raste.
Agron Duka!
Kryetar i PAA
