Këshilli i Mandateve në Kuvendin e Shqipërisë, ditën e sotme është mbledhur për të shqyrtuar kërkesën e grupit të Partisë Demokratike për heqjen e mandatit të deputetes Olta Xhaçka, pasi akuzohet se ka konflikt interesi përmes bashkëshortit të saj si investitor strategjik.
Kjo mbledhje është shoqëruar me debate të forta mes deputetëve të mazhorancës dhe të opozitës. Gazment Bardhi kërkoi shkarkimin e Xhaçkës, ndërkohë kryetari i Grupit Parlamentar të PS-së, Taulant Balla, ka kërkuar që PD të vërtetojë që ministrja ka përfituar të ardhura.
Balla: A ka fituar 1 qindarkë dhe nëse e ka fituar, në çfarë rruge e ka marrë, bankë kesh, çek, kriptovalutë. Thoni dhe ma provoni me fakte që ta ketë marrë. Nuk e keni seriozisht këtë punë, por mësohuni me rregulla. Sa i përket përfshirjes së këshillit për rregulloren në këtë proces. Parashikimit e nenit 70, pika 3, deputetët nuk mund të kryejnë asnjë veprimtari fitimprurës. Unë thashë sa ka qenë fitimi, ju thatë që nuk dini. Kjo tregon që fitimi nuk ka ndodhur, që nuk jemi përpara parashikimit të nenit 70 pika tre. Në të gjitha rastet kur jemi drejtuar gjykatës kushtetuese, ajo ka kërkuar vlerësimin e përfitimit. S’ka qenë përfitimi. Sipas kërkuesve, në këtë rast fitimi do të ndodhë por nuk e dinë kurrë.
