Snajperistja braziliane Thalia do Valle, 39 vjeçe, vdiq pas një bombardimi që ndodhi në Kharkiv më 30 qershor dhe shkaktoi zjarr në bunkerin në të cilin ndodhej me bashkatdhetarin e saj brazilian Douglas Búrigo.
Këtë e ka bërë të ditur vëllai i saj Théo Rodrigo Vieira, në deklaratat e mbledhura nga portali brazilian i lajmeve UOL. “Ajo ishte një heroinë dhe profesioni i saj ishte të shpëtonte jetë, duke marrë pjesë në misione humanitare ”, tha ai për mediumin e cituar. Do Valle u përfaqësua në radhët e Legjionit Ndërkombëtar si vullnetare . Një legjion që përbëhet nga shtetas të huaj, qëllimi i të cilëve ishte t’i bashkoheshin “rezistencës kundër pushtuesve rusë dhe të luftonin për sigurinë globale”.
Në vitet e mëparshme, ajo e zhvilloi karrierën e saj si aktore, modele dhe gjithashtu si shpëtimtare. Për më tepër, lufta në Ukrainë nuk është konflikti i vetëm ndërkombëtar i luftës në të cilin ajo mori pjesë. Ajo mori pjesë në një mision kundër Shtetit Islamik në Kurdistanin e Irakut. Pikërisht në këtë mision ajo u stërvit për t’u bërë snajperiste. Sipas vëllait të saj, ajo ka marrë trajnimin e nevojshëm për këtë.
“Kur hyri në ushtrinë kurde, ajo u specializua në qitje preçize.. Thalia ishte nga ushtria e grave dhe ishte pjesë e vijës së frontit me snajperistë elitë”, shpjegoi ai. Nga ana tjetër, ajo mori pjesë në operacione të ndryshme shpëtimi në Brazil. Një prej tyre ishte tragjedia në Mariana, në shtetin Minas Gerais, ku u shemb diga e mbetjeve minerare. Një tragjedi në të cilën humbën jetën 19 persona dhe që preku pothuajse 40 komuna të zonës.
Megjithatë, ajo nuk është e vetmja anëtare e Legjionit Ndërkombëtar Vullnetar që ka vdekur që nga fillimi i pushtimit rus. Qershorin e kaluar , organizata zyrtare e luftëtarëve vullnetarë të huaj raportoi vdekjen e katër ushtarëve vullnetarë , mes të cilëve një holandez, një australian, një gjerman dhe një francez.
