Edhe në ditën e sotme, është larguar paksa fokusi nga merkato verore. E vetmja marrëveshje që po diskutohet akoma është ajo e trekëndëshit: Barça-Kounde-Chelsea. Lojtari duket më pranë katalanasve por londinezët nuk dorëzohen.
Ndjekim disa nga titujt kryesorë të mediave sportive:
“Kounde 2027” është titulli i “Sport”, me gazetën katalanase që beson se mbrojtësi francez do të firmosë deri në vitin 2027 me klubin blaugrana.
“Toka e Dybalas” ka shkruar “il Romanista”. Një pritje madhështore u bë për yllin argjentinas nga tifozeria e Romës në ditën e prezantimit para qytetit.
“Quotidiano Sportivo” ka si titull kryesor disa nga objektivat e bardhezinjve “Paredes-Werner, rinis Juve”. Duket se merkato e klubit torinez nuk është mbyllur ende, pasi ata janë gati dhe për dy goditje të tjera.
“Shënoj 30 gola, fitoj titullin me Juven” është titulli i “Tuttosport”. Ky është basti i Vlahovic për këtë sezon, ku sulmuesi serb duket tepër optimist.
“Corriere dello Sport” është fokusuar tek fjalët e ‘La Joya’ gjatë prezantimit “Roma, unë do t’ju ndihmoj të fitoni”.
Gazeta madrilene “Marca” ka si titull kryesor yllin portugez dhe shkruan “Cristiano, telenovela e verës”. Duket se dhe Cristiano Ronaldo ka vendosur të qendrojë tek ‘Djajtë e Kuq’ , ai ka qënë dje për takim me drejtuesit e klubit për të diskutuar opsionet më të mira për të ardhmen e tij.
“Idhulli im është Ronaldinho” ka shkruar “Mundo Deportivo”. Këto ishin fjalët e Raphinhas në një intervistë së fundmi, ku nuk ngurroi ti përgjigjej pyetjes.
