Emigrantët shqiptarë që mbërrijnë me gomone në Angli, bëhen pjesë e krimit të organizuar. Është ky shqetësimi i Richard Tice, udhëheqës i partisë angleze Reforma.
Përmes një editoriali, ai komentoi investigimin e Mail On Sunday nga ku është zbuluar se 4 në 10 persona që mbërrijnë me gomone të Angli janë shqiptarë.
Tice thotë se të rinjtë shqiptarë që vendosin jetën në rrezik duke hipur në gomone, kthehen në ushtarë të krimit të organizuar, duke zëvendësuar ata që kapen nga policia.
“Nuk dua te keqkuptohem. Shqipëria nuk është një vend luksi. Shumë jetojnë në varfëri dhe korrupsioni është i përhapur. Megjithatë është një vend me një ekonomi në rritje të shpejtë. Shqiptarët të cilët marrin këtë udhëtim të gjatë në Europë drejt brigjeve franceze nuk janë të tillë me jetët e tyre në rrezik”, shkroi ai.
“Ekziston mundësia se shumë prej atyre që mbërrijnë me gomone kthehen në ushtarë të grupeve kriminale duke zëvendësuar ata që janë dënuar e janë pas hekurave. Sikurse ata mund të përdoren si skllevër modern në tregun e zi të punës ku kanë pjesën e tyre gangsterët shqiptarë. Qeveria jonë detyrohet të na japë një përgjigje”, shtoi më tej.
Sipas një raporti sekret të Inteligjencës Ushtarake, në Angli, 40% e emigrantëve në kanalin e “La Mansh-it”, që ndan Britaninë e Madhe nga kontinenti europian, janë nga Shqipëria. Mësohet se rreth 1075 emigrantë kaluan me gomone 6 muajt e fundit, ndërsa vitin e kaluar ka qenë një shifër prej 757.
Hulumtimet e reja tregojnë se në shtatë vitet e fundit, gati gjysmë miliardë paund janë shpenzuar nga qeveria në përpjekje për të parandaluar kalimin e emigrantëve.
